~~META:
title = Якуб Колас — Старыя дубы
&keywords = вітаю, дубы, зноў, вашы
&abstract = Чытаць верш Якуба Коласа "Старыя дубы"
&iftrue = nan
~~

====== Якуб Колас — Старыя дубы ======
Зноў я бачу, зноў вітаю,

Як паноў вяльможных,

Па-над Нёманам у гаю

Гурт дубоў разложных.

\\
Сам не ведаю, чым мілы,

Чым вы сэрцу любы,

Выхаванцы веку, сілы,

Магутныя дубы.

\\
Чымся мілым, чымся родным

Ад вас павявае,

Аж мне сэрца ў спеў лагодны

Штосьці ахінае.

\\
Узварухнуцца думкі-песні,

Як вашы лісцінкі,

І зноў станеш напрадвесні

Жыццёвай пуцінкі.

\\
Цешуся я, пазіраю

На вас, вежы-дрэвы,

Цьмяна сэрцам прачуваю

Вашы думкі-спевы.

\\
Але шум я не той чую –

І вы парадзелі,

І вы не ўсе буру злую

Знеслі і здалелі.

\\
Ой, асілкі ў ціхім гаю,

Дубы векавыя!

Я вітаю вас, вітаю,

Волаты любыя!

\\
1912 г.

 


===== Падобныя старонкі =====
  * [[творы/якуб-колас/паэма-новая-зямля-мастацкая-энцыклапедыя]]
  * [[творы/якуб-колас/творчасць-якуба-коласа]]
  * [[творы/якуб-колас/служэнне-народу-асноўны-абавязак-мастака]]
  * [[творы/якуб-колас/карціны-роднай-прыроды-ў-паэме-новая-зям]]
  * [[творы/якуб-колас/духоўнае-багацце-чалавека-ў-паэме-новая-]]