~~META:
title = Якуб Колас — Родныя вобразы
&keywords = Колас, вобразы
&abstract = Чытаць верш Якуба Коласа "Родныя вобразы"
&iftrue = nan
~~

====== Якуб Колас — Родныя вобразы ======
Вобразы мілыя роднага краю,\\
Смутак і радасць мая!\\
Што маё сэрца да вас парывае?\\
Чым так прыкованы я\\
\\
К вам, мае ўзгорачкі роднага поля,\\
Рэчкі, курганы, лясы,\\
Поўныя смутку і жальбы нядолі,\\
Поўныя сумнай красы?\\
\\
Толькі я лягу і вочы закрыю,\\
Бачу я вас прад сабой.\\
Ціха праходзіце вы, як жывыя,\\
Ззяючы мілай красой.\\
\\
Чуецца гоман мне спелае нівы,\\
Ціхая жальба палёў,\\
Лесу высокага шум-гул шчаслівы,\\
Песня магутных дубоў...\\
\\
Вобразы мілыя, вобразы смутныя,\\
Родныя вёскі і люд,\\
Песні цягучыя, песні пакутныя!..\\
Бачу і чую вас тут.\\


 


===== Падобныя старонкі =====
  * [[творы/авяр-ян-дзеружынскі/авяр-ян-дзеружынскі-я-спяваю-ты-спявай]]
  * [[ibdc.ped>святло-радзімы]]
  * [[ibdc.ped>мой-край]]
  * [[творы/васіль-зуёнак/васіль-зуёнак-будучыня]]
  * [[ibdc.ped>свой-край]]