~~META:
title = Якуб Колас — Мой родны кут, як ты мне мілы!..
&keywords = зыкі, песень, маладыя
&abstract = Урывак з паэмы Якуба Коласа «Новая зямля» "Мой родны кут, як ты мне мілы!.."
&iftrue = nan
~~

====== Якуб Колас — Мой родны кут, як ты мне мілы!.. ======
//Урывак з паэмы «Новая зямля»//\\
\\
Мой родны кут, як ты мне мілы!..\\
Забыць цябе не маю сілы!\\
Вось як цяпер, перада мною\\
Устае куточак той прыгожа,\\
Крынічкі вузенькае ложа\\
І елка ў пары з хваіною,\\
Абняўшысь цесна над вадою,\\
Як маладыя ў час кахання,\\
Ў апошні вечар расставання.\\
І бачу лес я каля хаты,\\
Дзе колісь весела дзяўчаты\\
Спявалі песні дружным хорам,\\
З работ ідучы позна борам.\\
Нясліся зыкі песень здольных,\\
Ў лясах раз-пораз адбівалісь,\\
І ім узгоркі адклікалісь,\\
І радасць біла ў песнях вольных.\\
А хвоі, елкі векавыя\\
Пад зыкі песень маладыя\\
Маўчком стаялі ў нейкай думе,\\
І ў іх ціхусенечкім шуме\\
Няслось вячэрняе маленне\\
Ўгару, святое аддаленне.

 


===== Падобныя старонкі =====
  * [[творы/якуб-колас/творчасць-якуба-коласа]]
  * [[творы/якуб-колас/духоўнае-багацце-чалавека-ў-паэме-новая-]]
  * [[творы/якуб-колас/карціны-роднай-прыроды-ў-паэме-новая-зям]]
  * [[творы/якуб-колас/служэнне-народу-асноўны-абавязак-мастака]]
  * [[творы/якуб-колас/паэма-новая-зямля-мастацкая-энцыклапедыя]]