~~META:
title = Якуб Колас — Зайчыкі
&keywords = зайчыка, зайчык, свеце, зайчыкі, выбавяць, жыць, возера, ходзіць, ворага, лясочку, ваду
&abstract = Апавяданне Якуба Коласа "Зайчыкі"
&iftrue = nan
~~

====== Якуб Колас — Зайчыкі ======
Селі два зайкі ў лясочку пад бярэзінкаю, грэюцца на сонейку і гутараць.\\
А ў лясочку так добранька!.. Мушкі гудуць, адна за адною ганяюцца, крыльцамі звоняць, як бы смяюцца. А там дроздзік пасвіствае, хлопчыка Піліпку падражнівае:\\
– Пюліп! Пюліп!\\
А Піліпка па верасочку з кошыкам ходзіць, на баравічкі прыглядаецца.\\
Яшчэ далей зязюлька кукуе.\\
Ну так ясна, цёпла, весела!\\
Але нявесела зайчыкам, невясёлыя гутаркі іх.\\
– Ох, якая горкая долечка наша, – кажа адзін зайчык. – Бойся кожны дзянёчак, трасіся кожную часінку, хадзі, прыслухоўвайся, ці не ходзіць вораг твой блізка.\\
– А колькі ў нас ворагаў? Хто толькі не крыўдзіць нас, бедных зайчыкаў?\\
– Крыўдзяць нас людзі, крыўдзяць звяры; нават птушкі-драпежнікі – каршуны, совы, пугачы – і тыя нас, зайчыкаў, ушчуваюць.\\
– І як бараніцца нам ад злых нашых ворагаў? Чым ратаваціся? Адна толькі надзея на нашы ножкі: выбавяць з бяды – наша шчасце, а не выбавяць – прапала наша скурка!\\
І заплакалі горкенька зайчыкі. Плачуць і слёзкі лапкамі выціраюць.\\
– Ці ж можна нам жыць на свеце? – кажа другі зайчык. – Ніхто не баіцца нас, – ну, ніхтосенькі!.. Пойдзем, хіба, ды ў ваду кінемся.\\
Наплакаліся, надумаліся бедныя зайчыкі і пайшлі ў возера тапіцца з гора. Прыйшлі да возера, прыпыніліся, развіталіся. Да самага беражка падышлі, каб у ваду кінуцца, аж бачаць – скок жаба на купіну: убачыла зайчыкаў і спалохалася.\\
– Эге, – кажа адзін зайчык, – ёсць жа на свеце стварэнні, што і нас баяцца. Відаць, ім яшчэ цяжэй на свеце жыць.\\
Глянулі зайчыкі адзін на аднаго і пабеглі назад у лясок.\\
\\
[1906–1907, 1928]

 


===== Падобныя старонкі =====
  * [[творы/якуб-колас/духоўнае-багацце-чалавека-ў-паэме-новая-]]
  * [[творы/якуб-колас/паэма-новая-зямля-мастацкая-энцыклапедыя]]
  * [[творы/якуб-колас/творчасць-якуба-коласа]]
  * [[творы/якуб-колас/служэнне-народу-асноўны-абавязак-мастака]]
  * [[творы/якуб-колас/карціны-роднай-прыроды-ў-паэме-новая-зям]]