~~META:
title = Якуб Колас — Дуб
&keywords = дуб, стаіць, старый, шум
&abstract = Верш Якуба Коласа "Дуб"
&iftrue = nan
~~

====== Якуб Колас — Дуб ======
Сілачом стаіць\\
Дуб разложысты,\\
І здалёк відаць\\
Пышны верх яго.\\
\\
А ўнізе пад ім\\
Нёман коціцца,\\
Срэбрам-стужкаю\\
Павіваецца.\\
\\
У нагах трава\\
Нізка сцелецца,\\
А вакол ляжыць\\
Травяністы луг.\\
\\
Ў глыб зямлі ўвайшлі\\
Карані яго.\\
Крэпка дуб стаіць,\\
Не варушыцца!\\
\\
Так размашыста\\
Параскіданы\\
Ва ўсе стораны\\
Лапы крэпкія.\\
\\
Комель – слуп-скала,\\
Дыша сілаю,\\
А ўгару зірнеш –\\
Шапка валіцца.\\
\\
Дуж ты, дуб стары,\\
Сын вякоў сівых!\\
Многа бур ты знёс\\
На вяку сваім!\\
\\
Налятаў віхор\\
З навальніцаю,\\
Ды не гнуўся ты\\
Перад бураю!..\\
\\
Гэй ты, дуб стары,\\
Вартаўнік лугоў!\\
Аддае твой шум\\
Спевам-музыкай.\\
\\
А пра што шуміш\\
І аб чым пяеш,\\
Пра то ведаюць\\
Ветры вольныя,\\
\\
Што з табой вядуць\\
Мову сталую\\
Ў летні добры час\\
Або восенню.\\
\\
Я падслухаю\\
Гэты шум лістоў,\\
А з іх гутаркі\\
Песня зложыцца.\\
\\
1910

 


===== Падобныя старонкі =====
  * [[творы/якуб-колас/духоўнае-багацце-чалавека-ў-паэме-новая-]]
  * [[творы/якуб-колас/карціны-роднай-прыроды-ў-паэме-новая-зям]]
  * [[творы/якуб-колас/служэнне-народу-асноўны-абавязак-мастака]]
  * [[творы/якуб-колас/паэма-новая-зямля-мастацкая-энцыклапедыя]]
  * [[творы/якуб-колас/творчасць-якуба-коласа]]