~~META:
title = Якуб Колас — Дзед-госць
&keywords = песняй, белабароды, дзед
&abstract = Чытаць верш Якуба Коласа "Дзед-госць"
&iftrue = nan
~~

====== Якуб Колас — Дзед-госць ======
Ходзіць дзед белабароды\\
Полем, лесам, пералескам,\\
Засцілае рэчкі лёдам,\\
Брыльянцістым снежным блескам.\\
\\
Сыпле іней на бярозы,\\
Туліць дрэвы лёгкім пухам,\\
Крые руні, травы, лозы\\
Белай посцілкай-кажухам.\\
\\
Дзеда ўсюды носяць ногі,\\
І к нам прыйдзе на хвілінку\\
Адпачыць крыху з дарогі,\\
Важна сеўшы на ялінку.\\
\\
А ялінка!.. Чаго толькі\\
На яе няма галінках!\\
Свецяць зоркі і вясёлкі\\
У бліскучых павуцінках.\\
\\
Тут лісічка, зайчык, мышка,\\
Рыбкі, буслік даўгавязы.\\
А як ззяюць на ёй шышкі,\\
Нібы ў іх гараць алмазы!\\
\\
Каля ёлкі карагоды,\\
Песні, гутарка жывая,\\
А той дзед белабароды\\
Толькі ў вусы смех пускае.\\
\\
Дык рассунем кола шырай,\\
Патанцуем на памосце,\\
Песняй звонкай, песняй шчырай\\
Прывітаем дзеда-госця.

 


===== Падобныя старонкі =====
  * [[творы/якуб-колас/духоўнае-багацце-чалавека-ў-паэме-новая-]]
  * [[творы/якуб-колас/паэма-новая-зямля-мастацкая-энцыклапедыя]]
  * [[творы/якуб-колас/творчасць-якуба-коласа]]
  * [[творы/якуб-колас/служэнне-народу-асноўны-абавязак-мастака]]
  * [[творы/якуб-колас/карціны-роднай-прыроды-ў-паэме-новая-зям]]