~~META:
title = Якуб Колас — Арол
&keywords = Колас, арол
&abstract = Чытаць верш "Арол" Якуба Коласа
&iftrue = nan
~~

====== Якуб Колас — Арол ======
Шмат думак снуецца ў дарозе\\
Пад стук аднастайны калёс...\\
Пустэля. Ні хвой, ні бяроз,\\
А стэп замлявае ў знямозе.\\
\\
Мой друг дарагі! Што скажу я?\\
Прызнаюся проста: пра Вас\\
Я думаў, гадаў, і ня раз.\\
Вітаў я зямельку чужую,\\
\\
Вітаў я і тыя куточкі,\\
Што Вас узрасцілі ў красе,\\
І Вашы парывы, і радасці ўсе,\\
І добрыя дні Вашы й ночкі.\\
\\
І сумна было мне: нічога,\\
Нічога ж ня ведаў, дзе Вы,\\
І думкі ня йшлі з галавы –\\
Дзе ж Ваша праходзіць дарога?\\
\\
Няўжо ж не сустрэну ніколі\\
Ні ў гэтым, ні ў іншым краю\\
Вясну маладую маю,\\
Што ў ценю прыкрылі таполі?\\
\\
Няўжо ж у садочку вішнёвым,\\
Дзе Вы апявалі вясну,\\
Я болей на Вас не зірну,\\
Ня ўчую ўжо Вашага слова?\\
\\
І раптам – адкуль невядома –\\
Мільгнулася думка-страла:\\
Дзевятага згледжу арла –\\
І друга застану я дома.\\
\\
Быць можа, наіўнаю, смешнай\\
Пакажацца Вам варажба,\\
Ды ў ёй гаварыла журба\\
Душы маёй стомленай, грэшнай.\\
\\
І от – прасвятліліся вочы...\\
Арол светлакрылы! Арлу\\
Прыношу я чэсць і хвалу\\
За тое, што мне напрарочыў.\\
\\
1943

 


===== Падобныя старонкі =====
  * [[творы/якуб-колас/духоўнае-багацце-чалавека-ў-паэме-новая-]]
  * [[творы/якуб-колас/служэнне-народу-асноўны-абавязак-мастака]]
  * [[творы/якуб-колас/творчасць-якуба-коласа]]
  * [[творы/якуб-колас/карціны-роднай-прыроды-ў-паэме-новая-зям]]
  * [[творы/якуб-колас/паэма-новая-зямля-мастацкая-энцыклапедыя]]