~~META:
title = Язэп Пушча — Яшчэ ў юнацкія гады
&keywords = гады, малады, спатканне
&abstract = Чытаць санет Язэпа Пушчы "Яшчэ ў юнацкія гады"
&iftrue = nan
~~

====== Язэп Пушча — Яшчэ ў юнацкія гады ======
Даўно, яшчэ ў юнацкія гады,\\
Прызнаўся я табе ў сваім каханні.\\
Было не раз з табой маё спатканне,\\
Калі ўзыходзіў месяц малады.\\
\\
Цераз плячо з сярпом зубчатым тым\\
Ішла ты з песняй зорнаю мяжою.\\
Ты роднай мне была, а не чужою,\\
Звінела шчасце ў слове залатым.\\
\\
Блакітны васілёк чало і стан\\
Абвіў. Спявала ты з такім запалам,\\
Што плакаў росамі сівы туман.\\
\\
I песня тая ў сэрца мне запала,\\
Пранёс яе дарогамі жыцця\\
I ўзняў высока з ёй чырвоны сцяг.\\
\\
1956 г.

 


===== Падобныя старонкі =====
  * [[творы/максім-багдановіч/максім-багдановіч-санет-замёрзла-ноччу-ш]]
  * [[слоўнік/вянок-санетаў]]
  * [[слоўнік/санет]]
  * [[творы/максім-багдановіч/максім-багдановіч-санет-паміж-пяскоў-егі]]
  * [[творы/янка-купала/янка-купала-для-зямлі-прадзедаў-маіх]]