~~META:
title = Язэп Пушча — У Шчорсах
&keywords = гомане, краса
&abstract = Чытаць верш Язэпа Пушчы "У Шчорсах"
&iftrue = nan
~~

====== Язэп Пушча — У Шчорсах ======
Верасень са шчодрай жмені\\
Сыпле збожжа у прыгоршчы.\\
Адспявалі ў полі жнеі,\\
Ў харастве асеннім Шчорсы.\\
\\
Залатыя акварэлі\\
Палымнеюць на узлессі.\\
Льюцца трапяткія трэлі\\
Ціхай, неўміручай песні.\\
\\
Я іду на вокліч гэты,\\
I душы, і сэрцу блізкі.\\
Тут не раз сябры-паэты\\
Свой паклон аддалі нізкі.\\
\\
Вось ён – дуб, магутны веліч,\\
Вецер-хлопчык гне ажыну.\\
Колісь тут [[постаці/адам-міцкевіч|Адам Міцкевіч]]\\
Сустракаў сваю [[творы/адам-міцкевіч/адам-міцкевіч-гражына|Гражыну]].\\
\\
Дуб лісты з галін страсае,\\
Падаюць на дол са звонам.\\
Ажыве вясной краса іх\\
Ў гомане дубоў зялёных.\\
\\
Рад я пакланіцца дубу\\
I Гражыне, яснай зорцы;\\
Ўспамінаць вас часта буду\\
На сваім шляху да сонца.\\
\\
1960 г

\\
\\
Крыніца: Пушча Я. Збор твораў. У 2 т. Т. 2. Вершы. Паэмы. Пераклады. Крытычныя артыкулы 1930-1963. – Мінск: Мастацкая літаратура, 1994. – 462 с.

 


===== Падобныя старонкі =====
  * [[постаці/язэп-пушча]]
  * [[ibdc.ped>бібліятэка-легенда-4112]]
  * [[творы/язэп-пушча/язэп-пушча-на-возеры]]
  * [[творы/язэп-пушча/язэп-пушча-раніца]]
  * [[творы/язэп-пушча/язэп-пушча-раніцу-шчэбет-пільнуе]]