~~META:
title = Язэп Пушча — Сяўба
&keywords = сяўба
&abstract = Чытаць верш "Сяўба" Язэпа Пучшы
&iftrue = nan
~~

====== Язэп Пушча — Сяўба ======
Які размах, які разгон!\\
Не тое, што раней загон,\\
Дзе поркаўся араты з плугам\\
Ды панукаў кабылку пугай.\\
\\
На вёрсты пралягаюць гоні,\\
Спяшаюцца стальныя коні,\\
І без панукі, без прынукі\\
Вядуць іх маладыя рукі\\
Вясёлых хлопцаў-трактарыстаў,\\
Ні крышачку не ганарыстых.\\
\\
З іх кожны любіць быць паэтам.\\
Раджае спеў вясна і лета,\\
Раджае ніва каласамі,\\
Даль з журавамі і гусямі.\\
Ну як, скажыце, устрымацца,\\
На крылах песні не узняцца?\\
\\
У небе заяснелі зоры,\\
За дзень узораны прасторы,\\
Што нават вокам не акінуць.\\
Усе скібы спорныя якія,\\
А глеба плённая такая,\\
Зярнят і сейбіта чакае.\\
Ён, дбайны сейбіт,

заўтра прыйдзе,

Засее нівы ўсе за тыдзень.\\
\\
Вясной, ў сяўбу, гарачым часам,\\
Ўстаюць на вёсцы з сонцам разам.\\
Сяўба спаць позна не дазволіць,\\
Яна, як песня,

кліча ў поле,

А трактары, як запявалы,\\
Склікаюць да працоўнай славы.\\
\\
Сяўба ідзе, сяўба пачата,\\
На ніве хлопцы і дзяўчаты.\\
Над полем толькі пылу хмаркі,\\
Ды сонечны прамень няяркі,\\
Ды спевы працы веснавое:\\
«Гэй, шчасце наша залатое...»\\
\\
2 снежня 1962 г., Мінск

 


===== Падобныя старонкі =====
  * [[постаці/язэп-пушча]]
  * [[творы/язэп-пушча/язэп-пушча-на-возеры]]
  * [[творы/язэп-пушча/язэп-пушча-раніцу-шчэбет-пільнуе]]
  * [[творы/язэп-пушча/язэп-пушча-раніца]]
  * [[творы/янка-сіпакоў/янка-сіпакоў-сяўба]]