~~META:
title = Язэп Пушча — Светлых дзён хараство
&keywords = вясна, светлых, дзён, хараство, санцацвеце, губляюцца, мары, смех, дзявоча-пралескавы, ясноце, надхмар'і, песні, госці
&abstract = Верш Язэпа Пушчы "Светлых дзён хараство"
&iftrue = nan
~~

====== Язэп Пушча — Светлых дзён хараство ======
О, вясна, светлых дзён хараство!\\
Ў санцацвеце губляюцца мары.\\
Смех дзявоча-пралескавы твой\\
Патануў у ясноце, ў надхмар’і.\\
\\
Вецер вольны планету абег, –\\
Ў падарожжы мне з ім не агоркне.\\
Заклікаць выйду ў поле цябе,\\
Пакланюся далінам, узгоркам.\\
\\
З імі песні складаў я раней,\\
З імі песні складалі ракіты.\\
Там вятры закалышуць мяне,\\
Госці сонца і госці блакіту.\\
\\
Ой, ты цёплая радасць палёў,\\
Не хадзіць мне мяжой да крыніцы.\\
Як у лозах я кошыкі плёў,\\
Толькі ў песнях і можа прысніцца.\\
\\
Што было, таго сёння няма.\\
Адцвіло палыновае зелле.\\
У палях расцвітае вясна,\\
У палях веснавое вяселле.

\\
О, вясна, светлых дзён хараство!\\
Ў санцацвеце губляюцца мары.\\
Смех дзявоча-пралескавы твой\\
Патануў у ясноце, ў надхмар’і.\\
\\
21 сакавіка 1926 года.

 


===== Падобныя старонкі =====
  * [[творы/язэп-пушча/язэп-пушча-раніца]]
  * [[постаці/язэп-пушча]]
  * [[творы/язэп-пушча/язэп-пушча-сяўба]]
  * [[творы/язэп-пушча/язэп-пушча-раніцу-шчэбет-пільнуе]]
  * [[творы/язэп-пушча/язэп-пушча-на-возеры]]