~~META:
title = Язэп Пушча — Раніцу шчэбет пільнуе ...
&keywords = раніца
&abstract = Чытаць верш Язэпа Пушчы "Раніцу шчэбет пільнуе ..."
&iftrue = nan
~~

====== Язэп Пушча — Раніцу шчэбет пільнуе ... ======
Раніцу шчэбет пільнуе\\
у лісці жоўта-зялёным.\\
Туліцца жнівень пад пуняй\\
з ношкай аўсянай саломы.\\
\\
Сонца бліскучым пласконнем\\
іскры ў тумане губляе.\\
Ветры — пужлівыя коні\\
рвуцца ў мурожныя далі.\\
\\
У зараслях пудзяцца песні:\\
выбрыкаваць хочуць —

паверце.

Вёска рыпамі весніц\\
цешыць сялянскае сэрца.\\
\\
Сівер расой ахрысціў\\
поплавы ў сіні шырокай.\\
Песціцца сонца ў трысці,\\
цалуючы ветразь у шчокі.\\
\\
Раніцу шчэбет пільнуе\\
у лісці жоўта-зялёным.\\
Туліцца жнівень пад пуняй\\
з ношкай аўсянай саломы.

 


===== Падобныя старонкі =====
  * [[ibdc.ped>раніцою]]
  * [[творы/авяр-ян-дзеружынскі/авяр-ян-дзеружынскі-летняя-раніца]]
  * [[ibdc.ped>вясновая-раніца]]
  * [[творы/язэп-пушча/язэп-пушча-раніца]]
  * [[творы/якуб-колас/якуб-колас-раніца-вясною]]