~~META:
title = Язэп Пушча — На возеры
&keywords = возера
&abstract = Чытаць верш "На возеры" Язэпа Пушчы
&iftrue = nan
~~

====== Язэп Пушча — На возеры ======
На возеры вечар зялёны\\
Пад сонцам ідзе залатым;\\
Таполі, і ліпы, і клёны\\
У парку шумяць маладым.\\
\\
На возеры лодкі-маторкі\\
I вёсел вясёлы усплёс;\\
Ўсміхнуліся першыя зоркі,\\
I вечар расінкі растрос.\\
\\
А месяц рассыпаўся срэбрам\\
I свеціць з блакітнай гары;\\
На выспах — бярозкі, і вербы,\\
I песні вячэрняй зары.\\
\\
Тут вербы схіляюцца нізка,\\
Калі ім паклоніцца госць.\\
Спявае на возеры Мінскім\\
Мая і твая маладосць.\\
\\
1959

 


===== Падобныя старонкі =====
  * [[творы/язэп-пушча/язэп-пушча-раніца]]
  * [[творы/язэп-пушча/язэп-пушча-прабач-мой-дружа-мой-чытач]]
  * [[творы/язэп-пушча/язэп-пушча-сяўба]]
  * [[творы/язэп-пушча/язэп-пушча-раніцу-шчэбет-пільнуе]]
  * [[постаці/язэп-пушча]]