~~META:
title = Язэп Пушча — Зоська і Антосік
&keywords = васількі, каласкі
&abstract = Чытаць верш "Зоська і Антосік" Язэпа Пушчы
&iftrue = nan
~~

====== Язэп Пушча — Зоська і Антосік ======
Вышывае шоўкам Зоська\\
Браціку свайму Антоську\\
На сарочцы каласкі\\
I між імі – васількі.\\
\\
Каласкі жаўцеюць, спеюць,\\
Васількі ўсё больш сінеюць.\\
Як жывыя каласкі,\\
I смяюцца васількі.\\
\\
Хвалі ходзяць, як на ніве,\\
I блакіт плыве над імі.\\
Пад блакітам – каласкі\\
I між імі – васількі.\\
\\
I праменьчык зіхатлівы,\\
Як струменьчык мігатлівы,\\
Поіць сонцам каласкі,\\
I смяюцца васількі.\\
\\
I Антоську ў той сарочцы\\
Не пазнаюць, пэўна, хлопцы:\\
На сарочцы – каласкі\\
I між імі – васількі.

 


===== Падобныя старонкі =====
  * [[творы/язэп-пушча/язэп-пушча-раніцу-шчэбет-пільнуе]]
  * [[творы/язэп-пушча/язэп-пушча-раніца]]
  * [[творы/язэп-пушча/язэп-пушча-на-возеры]]
  * [[творы/язэп-пушча/язэп-пушча-сяўба]]
  * [[постаці/язэп-пушча]]