~~META:
title = Язэп Пушча — Буду жыць
&keywords = санет
&abstract = Чытаць верш "Буду жыць" Язэпа Пушчы
&iftrue = nan
~~

====== Язэп Пушча — Буду жыць ======
Народны лёс я завіваю у санет,\\
Каб ён, жывы, чало Радзіме упрыгожыў.\\
Свайго народа дух высокі, светлы розум\\
Нясу у свет, як песню радасці паэт.\\
\\
Хачу ў санетах выткаць родныя узоры:\\
Крынічаньку, што рэчанькай у свет бяжыць.\\
Вякі мінуць, а я хачу у песні жыць,\\
Пакуль у небе не пагаснуць сонца, зоры.\\
\\
Я прыпадаю да тваіх, зямля, грудзей\\
I прагна сок твой п’ю і веру у бяссмерце,\\
I б’ецца пульс і абуджае спеў у сэрцы.\\
\\
Іду я да цябе, як радасць да людзей,\\
Нясу і аддаю вянок жывых санетаў,\\
Гарачым сэрцам і агнём душы сагрэтых.\\
\\
1957 г.

 


===== Падобныя старонкі =====
  * [[творы/максім-багдановіч/максім-багдановіч-санет-замёрзла-ноччу-ш]]
  * [[творы/янка-купала/янка-купала-для-зямлі-прадзедаў-маіх]]
  * [[слоўнік/вянок-санетаў]]
  * [[творы/максім-багдановіч/максім-багдановіч-санет-паміж-пяскоў-егі]]
  * [[слоўнік/санет]]