~~META:
title = Ядвіга Бяганская — Цяжкая задача
&keywords = ганя, задачнік, паўлаўна, вольга, сказала, настаўніца, дошкі, рашыла, задачніку, кніжку
&abstract = Чытаць апавяданне Ядвігі Бяганскай "Цяжкая задача"
&iftrue = True
~~

====== Ядвіга Бяганская — Цяжкая задача ======
Ганя зноў не рашыла задачку.\\
– У маім задачніку гэтай задачкі няма, – сказала яна настаўніцы.\\
– Я к гэта няма?! – здзівілася Вольга Паўлаўна. – Хіба ў цябе не такі задачнік, як у іншых вучняў?\\
– Няма... – паўтарыла Ганя, паціскаючы плячыма.\\
– Хто яшчэ не знайшоў у сваім задачніку гэтай задачкі? – спытала настаўніца, абводзячы позіркам прыціхлы клас.\\
Вучні маўчалі.\\
– Выходзіць, што толькі ў Ганіным задачніку яе няма, – сказала Вольга Паўлаўна. – Дай мне свой задачнік, Ганя. Можа, у ім старонкі пераблытаны?\\
– А задачнік я дома пакінула, – прамовіла Ганя. – Навошта мне такі задачнік? Я новы куплю.\\
– Задачнік трэба заўсёды прыносіць у клас. Хіба ты забылася пра гэта?\\
– Забылася, – ледзь чутна прамовіла Ганя, і твар яе пачырванеў.\\
– Ну што ж, калі ты не рашыла дома задачку, ідзі да дошкі, – сказала настаўніца.\\
Ганя падышла да дошкі, узяла ў рукі крэйду, запісала ўмову задачы, якую прадыктавала ёй Вольга Паўлаўна,падумала крыху і пачала рашаць.\\
А настаўніца тым часам хадзіла паміж парт, пазірала час ад часу на дошку, слухала тлумачэнні Гані, а калі тая памылялася, папраўляла яе.\\
Параўняўшыся з Ганінай партай, Вольга Паўлаўна заўважыла на падпозе кніжку. Відаць, дзяўчынка незнарок скінула яе, калі заспяшалася да дошкі. Вольга Паўлаўна падняла кніжку, усміхнулася і пачала гартаць.\\
– Усё, – зірнула Ганя на настаўніцу.\\
– Сядай, правільна рашыла, – сказала Вольга Паўлаўна.\\
Ганя паклала крэйду, выцерла анучкай пальцы і, задаволеная, пайшла да сваёй парты.\\
– Вазьмі свой задачнік, – падала ёй настаўніца кніжку.\\
Ганя залілася чырванню і вінавата паглядзела на Вольгу Паўлаўну.

 


===== Падобныя старонкі =====
  * [[творы/казімір-камейша/казімір-камейша-задача]]
  * [[творы/анатоль-грачанікаў/анатоль-грачанікаў-задача]]
  * [[ibdc.ped>кантрольная-па-фізіцы]]
  * [[творы/юрась-свірка/юрась-свірка-не-рашаецца-задача]]
  * [[творы/ядвіга-бяганская/ядвіга-бяганская-новенькая]]