Пісьменства

Гэтая старонка толькі для чытання. Вы можаце паглядзець яе зыходны тэкст, але не можаце яго змяніць. Паведаміце адміністратару, калі лічыце, што гэта няправільна.
~~META:
title = Ядвіга Бяганская — Аленчыны канькі
&keywords = аленка, ганя, коўзацца, янка, бойся, канькі, руку, каток
&abstract = Чытаць апавяданне Ядвігі Бяганскай "Аленчыны канькі"
&iftrue = nan
~~

====== Ядвіга Бяганская — Аленчыны канькі ======
На школьным двары залілі вялікі каток, і цяпер з самага ранку тут стаіць вясёлы гоман і смех.\\
Аленка з зайздрасцю назірае, як спрытна коўзаюцца аднакласнікі, якія фігуры выкручваюць на лёдзе. "Былі б у мяне канькі, я таксама не горш коўзалася б", – думае яна. Але канькоў у Аленкі няма. Ды і спадзявацца пакуль што не прыходзіцца: трэба справіць паліто старэйшай сястры, падрамантаваць кватэру…\\
– Чаму ты прыйшла на каток без канькоў? – цікавіцца Юрка.\\
Дзяўчынка не адказвае. Навошта?\\
– Хадзем, Аленка, я дам свае, – кажа, спыняючыся каля іх, Ганя.\\
– А я цябе навучу коўзацца, – дадае Янка.\\
Аленка з удзячнасцю глядзіць на сяброў, і на яе твары ўспыхвае ўсмешка.\\
Яны падыходзяць да лаўкі. Ганя скідвае свае чаравікі з канькамі і, усунуўшы ногі ў Аленчыны боцікі, дапамагае ёй абуцца.\\
– Я ж коўзацца зусім не ўмею, – збянтэжана кажа Аленка, трымаючыся за Янкаву руку.\\
– Навучышся, гэта проста, – падбадзёрвае Янка і, сціснуўшы мацней Аленчыну руку, падае каманду:\\
– Правай-левай! Правай-левай!\\
Зрабіўшы некалькі кругоў, Янка раптам выпускае яе руку:\\
– Ну а цяпер сама. Ды ты не бойся, не бойся!\\
– Ой! – палохаецца Аленка. Правая яе нага ўцякае ўперад, а левая чамусьці адстае, і дзяўчынка, узмахнуўшы рукамі, падае.\\
– Не бойся, яшчэ крыху павучымся, – смяецца Янка, і яны зноў коўзаюцца разам.\\
– Ну як, падабаецца? – пытае Ганя, калі Аленка з Янкам спыняюцца.\\
– Вельмі, – усміхаецца Аленка і пачынае расшнуроўваць чаравікі.\\
– Папрасі, каб і табе маці купіла канькі, – кажа сяброўцы Ганя. – Будзем разам коўзацца.\\
– Хіба пазней, – уздыхае Аленка і расказвае Гані пра свае хатнія клопаты.\\
– Ну, то прыходзь заўтра. Будзем на маіх па чарзе коўзацца.\\
Цяпер Аленка штовечар прыходзіць на каток. Ганя, угледзеўшы яе здалёк, спяшаецца насустрач. А з ёю Марынка, і Зося, і Верачка. Яны нават спаборнічаюць: хто першы ўгледзіць Аленку, той першы і канькі свае ёй аддае.

 


===== Падобныя старонкі =====
  * [[постаці/ядвіга-бяганская]]
  * [[ibdc.ped>на-каньках]]
  * [[творы/ядвіга-бяганская/ядвіга-бяганская-пра-казачных-чалавечкаў]]
  * [[творы/ядвіга-бяганская/ядвіга-бяганская-новенькая]]
  * [[творы/ядвіга-бяганская/ядвіга-бяганская-сланечнікі]]