~~META:
title = Юрась Свірка — Шчасце
&keywords = шчасце, спыталі, роднай
&abstract = Верш Юрася Свіркі "Шчасце"
&iftrue = nan
~~

====== Юрась Свірка — Шчасце ======
Пра шчасце ў дзяўчынкі спыталі.\\
Дзе шчасце, спыталі ў яе.\\
А шчасце – блакітная далеч.\\
А шчасце – што птушка пяе.\\
\\
А шчасце – пабегчы сцяжынкай,\\
дзе сінню цвітуць васількі;\\
лічыць на далонях дажджынкі\\
і плесці над рэчкай вянкі.\\
\\
А шчасце – з сябрамі на ўроку\\
адказ у задачы знайсці.\\
Дадому паспешлівым крокам\\
да роднай матулі ісці.\\
\\
А шчасце – плыць ціха на лодцы\\
сярод беласнежных лілей.\\
А шчасце – у роднай старонцы,\\
якая за ўсё даражэй.

 


===== Падобныя старонкі =====
  * [[ibdc.ped>проста-радасць]]
  * [[творы/янка-сіпакоў/янка-сіпакоў-шчасце]]
  * [[ibdc.ped>шчасце]]
  * [[творы/змітрок-бядуля/змітрок-бядуля-шчасце-не-ў-золаце]]
  * [[творы/максім-танк/максім-танк-шчасце]]