~~META:
title = Юльюш Славацкі — Песня дзяўчыны-казачкі
&keywords = кветкі, вандрую, пракленаў, плачу, любы, песня
&abstract = Чытаць верш Юльюша Славацкага "Песня дзяўчыны-казачкі"
&iftrue = nan
~~

====== Юльюш Славацкі — Песня дзяўчыны-казачкі ======
**I**

У месячным бляску трывожна-дзівосным

Вандрую са смуткам сцяжынай.

Кветку шукаю я з тысячы розных,\\
Над ёю бярозка схілілася слёзна,

I слёзы мае – сіраціны.

Як з нецвярозае, людзі смяюцца,

Не знаюць, аб чым я смутную.

Я кветкі зрываю – і вянуць, і гнуцца.

А я зноў па кветкі вандрую.\\


**II**

Плыве сабе слёзанька ціха і скрытна,

Бо плачу па цяжкай я згубе,

Глянь, ружа у полі пад ззяннем блакіта,\\
Канвалія белая з ружаю звіта,

Мой мілы казача, мой любы!

Што? Песня з царквы ці званкі ля аселіц?

Сябры ці сваты ўжо чакаюць?

Ах!.. Кветкі павялі – не на вяселле,

Па кветкі вандрую да гаю.

Не ад рыцарскай шабельнай згінуў ён сталі

Узнеслі магілу высока,

А колькі жменяў пяску насыпалі,\\
Столькі ж праклёнаў з пяском пасылалі, –

Мой любы, спіць ён глыбока.

Праклёнаў не чуў ён, не чуў ён і плачу

У тую цяжкую хвіліну.

Пясок беспрытульніка крые, бядачы.

Вянок жа мой – на дамавіну!

\\
//28 снежня 1829\\
\\
Пераклад Піліпа Пестрака//

\\
\\
Крыніца: Літаратура Беларусі ХІХ стагоддзя: анталогія / укладальнікі: К. А. Цвірка, І. С. Шпакоўскі, К. У. Антановіч – Мінск: Беларуская навука, 2013. – 862 с.

 


===== Падобныя старонкі =====
  * [[творы/юльюш-славацкі/жыццёвы-шлях-і-творчасць-юльюша-славацка]]
  * [[творы/юльюш-славацкі/юльюш-славацкі-гімн]]
  * [[творы/юльюш-славацкі/юльюш-славацкі-мой-тастамант]]