~~META:
title = Эдуард Валасевіч — Шырокая натура
&keywords = кашуля
&abstract = Чытаць байку Эдуарда Валасевіча "Шырокая натура"
&iftrue = nan
~~

====== Эдуард Валасевіч — Шырокая натура ======
– А-яй! – жахнулася матуля,\\
Ледзь на парог ступіў Змітрок,\\
– Ізноў з табой бяда, сынок?\\
Загінула навюткая кашуля!\\
Не пранасіў два дні,\\
А што з ёй сталася? Зірні,\\
Горш ад анучкі –\\
Ні гузікаў, ні каўняра...\\
А порткі ў сажы, што у камінара.\\
А чаравікі! Жах! Дабіў да ручкі...\\
Хоць трошкі б рэчы пабярог!\\
Ды матчыны маралі\\
Да Змітрака так прыставалі,\\
Як да сцяны гарох.\\
– Ну, завяла! Падумаеш: кашуля і штаны!\\
Нібы каштуюць тысячы яны...\\
У мяне шырокая натура!\\
– Хоць пасаромеўся б ты, дурань,\\
Узняўся, вунь, пад столь,\\
А ўсё з маёй не злазіш шыі –\\
Таму капейкі не шануеш і мазоль.\\
\\
Сыночкі ёсць такія,\\
Чаго граха таіць!..\\
Не хочуць ні вучыцца, ні рабіць,\\
А абібокамі мяркуюць век пражыць.

 


===== Падобныя старонкі =====
  * [[творы/авяр-ян-дзеружынскі/авяр-ян-дзеружынскі-памочніца]]