~~META:
title = Эдуард Валасевіч — Сякера
&keywords = сякера, кастусь
&abstract = Чытаць байку Эдуарда Валасевіча "Сякера"
&iftrue = nan
~~

====== Эдуард Валасевіч — Сякера ======
Купілі Кастусю сапраўдную сякеру\\
(Вядома, зменшаных памераў).\\
– Ну, вось, бяры сякеру, Кастусёк,\\
Займайся\\
І да цяслярскай справы прывучайся.\\
Ды асцярожны будзь з прыладаю, стручок!\\
Яшчэ услед парад нямала надавалі.\\
А Кастуся даўно ўжо на двары\\
Чакалі\\
Сябры.\\
Ён перад імі секануў з размаху па паркану,\\
Затым дзяўбці ўзяўся тэлеграфны слуп,\\
І нечакана,\\
Уявіўшы, што ён лесаруб,\\
Падаўся да бярозкі хуценька, з падскокам,\\
І не міргнулі хлопцы вокам,\\
Як размахнуўся Кастусёк і – шах! –\\
Здаецца, застагнала аж бярозка перад сконам\\
І ўпала на зямлю зялёнай кронай.\\
Тут хлопчыкаў апанаваў спачатку жах,\\
А потым гнеў\\
Ў грудзях разбушаваўся:\\
– Як ты пасмеў!\\
Ты што, ў звярынцы гадаваўся?\\
Яе мы пасадзілі, палівалі\\
І любаваліся яе красой!\\
Ты ж ссек яе сякераю сваёй...\\
І тут жа у яго сякеру адабралі,\\
А Кастусю, як трэба, кухталёў наклалі\\
У каршэнь...\\
– Ідзі, адсюль, дубовы пень.\\
Каб мы цябе тут больш не сустракалі.\\
\\
Хто вінаваты, а хто правы –\\
Вяршыце самі суд.\\
Адно скажу я тут:\\
Сякера блазну – дрэнная забава.

 


===== Падобныя старонкі =====
  * [[ibdc.ped>яблынька-дзічка]]
  * [[творы/уладзімір-караткевіч/уладзімір-караткевіч-дрэва-вечнасці]]
  * [[творы/мікола-мятліцкі/мікола-мятліцкі-я-дрэву-сказаў]]
  * [[ibdc.ped>таполя-4071]]
  * [[творы/алесь-разанаў/алесь-разанаў-дрэва]]