~~META:
title = Эдуард Валасевіч — Ручай і Возера
&keywords = спакой
&abstract = Чытаць байку Эдуарда Валасевіча "Ручай і Возера"
&iftrue = nan
~~

====== Эдуард Валасевіч — Ручай і Возера ======
У мяккіх берагах, замшэлых, топкіх,\\
Атуленае ад вятроў чаротамі, лазой,\\
Старое Возера залюбавалася сабой:\\
– Чаго мне мітусіцца і спяшацца некуды таропка?\\
Люблю утульнасць я, спакой і цішыню...\\
А некалі ж і я шумела... нібы мора!\\
І адлюстроўвала і неба вышыню,\\
І сонца, і начныя зоры,\\
І ўзлёт буслоў –\\
Чаго у маладосці не было!\\
А зараз мне навошта хвалявацца?\\
Магу патрызніць, падрамаць, папеставацца...\\
– Не так яно, бадай! –\\
Задорна зазвінеў Ручай. –\\
Прыемна перажытым захапляцца.\\
Але у тым твая бяда,\\
Твая загана,\\
Што супакоілася надта рана,\\
Што ты цяпер – стаячая вада,\\
Што тыя жыватворчыя крыніцы,\\
Якія з-пад зямлі\\
Табе і моц і сілы свежыя далі,\\
Праз глей не могуць да цябе прабіцца...\\
А зверху тванню ўсё ты заплыло\\
Ды з кожным годам –\\
Ператвараешся ў звычайнае балота...\\
А я, чарцям усім назло,\\
Упартым струмянём працерабіўшы нетры,\\
Імкнуся ўдалячынь насустрач ветрам!\\
З рачулкі станаўлюся мнагаводнаю ракой,\\
Ні днём ні уначы не ведаю спачыну,\\
Спынюся я – і я – загіну...\\
\\
Жыццё ёсць рух, а не спакой!

 


===== Падобныя старонкі =====
  * [[ibdc.ped>навальніца-на-возеры]]
  * [[творы/вера-вярба/вера-вярба-ручай-і-ялінка]]
  * [[ibdc.ped>свіцязь]]
  * [[ibdc.ped>па-дарозе-са-школы]]
  * [[ibdc.ped>лясное-возера]]