~~META:
title = Эдуард Валасевіч — Пчолы і Труцень
&keywords = пчолы, труцень, завёўся
&abstract = Чытаць байку Эдуарда Валасевіча "Пчолы і Труцень"
&iftrue = nan
~~

====== Эдуард Валасевіч — Пчолы і Труцень ======
На пасецы ў вуллі завёўся Труцень,

хцівы,

Шукальнік лёгкае спажывы.\\
Мядок ён не збіраў, а мёдам

харчаваўся,

Так атлусцеў, так ён разгадаваўся,\\
Што на яго аж страх глядзець:\\
Не Труцень, а Мядзведзь...\\
Адным ён толькі і займаўся:\\
Як Пчолы з поля прынясуць узятак,\\
Ён тут як тут, раскрыўшы прагны

рот,

І смокча свежы мёд\\
Заўзята.\\
Тут Пчолы бачаць – справы дрэнь:\\
Працуеш цэлы дзень,\\
Гаруеш, дбаеш\\
І дулю на талерцы маеш.\\
Гнаць Трутня гэтага ў каршэнь!\\
І Пчолы на яго рашуча наляцелі,\\
Аж мэтлахі ад Трутня паляцелі\\
З вулля на дол.\\
\\
Калі завёўся труцень у арцелі –\\
Бярыце прыклад з пчол!

 


===== Падобныя старонкі =====
  * [[творы/анатоль-вярцінскі/анатоль-вярцінскі-мы-мёд-і-пчала]]
  * [[творы/алесь-разанаў/алесь-разанаў-пчала]]
  * [[творы/артур-вольскі/артур-вольскі-пчала]]
  * [[творы/станіслаў-шушкевіч/станіслаў-шушкевіч-пчала]]
  * [[творы/станіслаў-шушкевіч/станіслаў-шушкевіч-пчала-і-авадзень]]