~~META:
title = Эдуард Валасевіч — Ліпа
&keywords = бычок, тона, зводка, лічба
&abstract = Чытаць байку Эдуарда Валасевіча "Ліпа"
&iftrue = nan
~~

====== Эдуард Валасевіч — Ліпа ======
Бычка здалі на мясакамбінат.\\
Бычок заважыў цэнтнер з гакам.\\
А ў зводцы ж зроблена адзнака,\\
Што важыў ён паўтоны акурат.\\
Ў раёне зводку пакруцілі\\
У руках\\
І на сваю і рызыку, і страх\\
Да тоны лічбу акруглілі...\\
«Вось гэтак мы якраз уложымся у план\\
Ды будзем у пашане!\\
Ну, а пакуль той выявяць падман,\\
Дык утрасецца ўсё, на месца стане...»\\
А ў вобласці сядзеў таксама зух,\\
Для міністэрства рыхтаваў ён справаздачу\\
І зводкі ўсе на лад свой перайначыў:\\
Дзе тона значылася – дацягнуў да дзвюх,\\
Дзе дзве было – там тры паставіў,\\
Збалансаваў і па інстанцыі адправіў...\\
«Так будзе цот у цот! Ажур!\\
Камар сам носа не падточыць...\\
Калі ж рэвізія наскочыць –\\
Апіска! Выбачайце! Цур!..»\\
...Дзядзькі чытаюць угары і дзіву аж даюцца:\\
Бычок, і... столькі тон?!\\
Ды гэта ж бегемот!\\
Ды гэта ж слон!\\
Так і да мамантаў, напэўна, дабяруцца...\\
\\
Няма чаго здзіўляцца і гадаць:\\
Другому тыпу –\\
Раз плюнуць – лічбу ў зводцы прыпісаць\\
І выдаць за сапраўднасць – ліпу!..

 


===== Падобныя старонкі =====
  * [[творы/эдуард-валасевіч/эдуард-валасевіч-мітрафан-і-дэльтаплан]]
  * [[творы/эдуард-валасевіч/эдуард-валасевіч-арэх-і-жаба]]
  * [[творы/эдуард-валасевіч/эдуард-валасевіч-шчупак-і-плотка]]
  * [[творы/эдуард-валасевіч/эдуард-валасевіч-сонца-і-певень]]
  * [[ibdc.ped>пацеркі-для-веры]]