~~META:
title = Эдуард Валасевіч — Зязюльчын сынок
&keywords = сынок, галодны
&abstract = Чытаць байку Эдуарда Валасевіча "Зязюльчын сынок"
&iftrue = nan
~~

====== Эдуард Валасевіч — Зязюльчын сынок ======
Малінаўцы Зязюля яйка падлажыла\\
І паляцела ў белы свет –\\
Яе прастыў і след:\\
Дзяцей яна ніколі не расціла.\\
Малінаўкі ж ад рання да начы,\\
Як толькі вывелі маленькіх птушанятак,\\
Не могуць і хвілінкі адпачыць,\\
Лічынкі носяць, машкару, зярняты –\\
Патрэбна ж ненажэру пракарміць.\\
А ён адно крычыць:\\
– Галодны я! Галодны!\\
«Ну і дзіцё! – карміліца ўздыхае, –\\
Ніяк валляк свой не напхае.\\
Ды гэта ж прыкра і неверагодна!..»\\
...А выхаванец, як падрос,\\
«Братоў малочных» выкінуў з дупла,\\
Каб аднаму быць ля стала.\\
Паскардзіліся птахі на свой лёс,\\
Пагаравалі, але ўцешыліся тым,\\
Што хоць адзін сынок у іх застаўся:\\
Мо ў старасці апорай будзе ім?\\
Такі ж дзыбаты і гарласты ён удаўся.\\
Былі ж дарэмнымі іх спадзяванні:\\
Калі «сыночак» апярыўся,\\
Ён ад кармільцаў «фі-і-ць!» і... скрыўся.\\
І дзякуй не сказаў на развітанне.\\
\\
Я ведаў аднаго Зязюльчына сынка,\\
Што не паслаў бацькам і пятака...

 


===== Падобныя старонкі =====
  * [[творы/яўгенія-янішчыц/яўгенія-янішчыц-у-калыханку-сыну]]
  * [[ibdc.ped>зязюльчыны-слёзы]]
  * [[творы/цётка-алаіза-пашкевіч/цётка-сынок-маленькі]]
  * [[ibdc.ped>нахабная-зязюля]]
  * [[творы/яўгенія-янішчыц/яўгенія-янішчыц-сынок-і-маці]]