~~META:
title = Эдуард Валасевіч — Арэх і Жаба
&keywords = арэх, жаба, ласунак
&abstract = Чытаць байку Эдуарда Валасевіча "Арэх і Жаба"
&iftrue = nan
~~

====== Эдуард Валасевіч — Арэх і Жаба ======
Па лесе Жаба спакваля скакала\\
І пільна паглядала навакол,\\
Яна спажыву для сябе шукала,\\
А ў гэты час арэх упаў на дол.\\
– Паслаў мне Бог дарунак! –\\
Заквакала Жабоцька на ўвесь лес. –\\
Я чула, што арэх – далікатэс,\\
Найлепшы на зямлі ласунак!\\
Вось зараз я арэшак раскушу\\
І пасмакую, адвяду душу!\\
І, ў рот паклаўшы плод саспелы,\\
Яго паспрабавала раскусіць,\\
Напялася, ажно пазелянела,\\
Але з арэшкам анічога не магла зрабіць.\\
(Бо Жаба, ведама, зубоў не мела!)\\
І, выплюнуўшы вон знаходку з раздражэннем,\\
Раздзёрла\\
Горла,\\
Закрычала з абурэннем:\\
–Ды гэта ж смех,\\
Пусціў хтось выдумку, як падсадную качку,\\
Што цуд-прысмак лясны арэх,\\
А я й паверыла, дзівачка...\\
Ды гэна ж не ласунак – дрэнь!\\
\\
Так іншы пачынае абурацца,\\
Наводзіць цень\\
На ясны дзень,\\
Бо сам да сутнасці не можа дакапацца.

 


===== Падобныя старонкі =====
  * [[творы/эдуард-валасевіч/эдуард-валасевіч-сонца-і-певень]]
  * [[творы/кандрат-крапіва/кандрат-крапіва-жаба-ў-каляіне]]
  * [[творы/эдуард-валасевіч/эдуард-валасевіч-мітрафан-і-дэльтаплан]]
  * [[ibdc.ped>жабіна-царства]]
  * [[творы/эдуард-валасевіч/эдуард-валасевіч-шчупак-і-плотка]]