~~META:
title = Эдуард Валасевіч — Арэхі і агрэхі
&keywords = лесе, арэхі
&abstract = Байка Эдуарда Валасевіча "Арэхі і агрэхі"
&iftrue = nan
~~

====== Эдуард Валасевіч — Арэхі і агрэхі ======
Ледзь празвініць званок,\\
Усхопіцца з-за парты Васілёк\\
І куляю ляціць дахаты –\\
Яго лясныя вабяць шаты!\\
Цудоўны лес у восеньскія дні –\\
Бярозкі нібы золатам абліты,\\
Гараць рабіны, бы ў агні,\\
І хвоі ціхай задуменнасцю спавіты...\\
А вунь сарока села на дубовы сук,\\
Мурашнік – пад таўшчэзнаю сасною,\\
Вавёрка скокнула над галавою,\\
І вожык выйшаў паляваць гадзюк,\\
А можа быць, на сонейку пагрэцца...\\
Ну, а арэхаў! Куст крані –\\
Град залаты забомкае, здаецца,\\
Ты толькі торбу разгарні,\\
Глядзіш – паўнюткая яна, як вока...\\
Хлапчук блукаў па лесе да змяркання,\\
Забыўшыся на хатнія заданні,\\
Ні аднаго не вывучыў урока.\\
Так праз арэхі\\
У вучобе паявіліся агрэхі.\\
– Ну як не сорам? Толькі год пачаўся, –\\
Настаўніца чытае Васільку мараль, –\\
А ты, на жаль,\\
Разленаваўся.\\
Любі прыроду і аберагай,\\
Але пра справы ты не забывай!

 


===== Падобныя старонкі =====
  * [[творы/эдуард-валасевіч/эдуард-валасевіч-арэх-і-жаба]]
  * [[творы/эдуард-валасевіч/эдуард-валасевіч-кот-і-вожык]]
  * [[творы/эдуард-валасевіч/эдуард-валасевіч-шчупак-і-плотка]]
  * [[творы/эдуард-валасевіч/эдуард-валасевіч-сонца-і-певень]]
  * [[творы/эдуард-валасевіч/эдуард-валасевіч-мітрафан-і-дэльтаплан]]