~~META:
title = Эдуард Акулін — Туюгі
&keywords = сонца, нялюбай, душу
&abstract = Чытаць туюгі Эдуарда Акуліна
&iftrue = nan
~~

====== Эдуард Акулін — Туюгі ======
*\\
Паўднёвае сонца лавінай з гары\\
сцякала. Ты мовіла: – Любы, згарым,\\
і першай сігнула насустрач абвалу\\
снапоў залатых, што ліліся згары.\\
\\
*\\
Нялюбай цела – вабнасць-чары –\\
я піў да дна світальнай чарай...\\
Ды дзень падкраўся, нібы кара,\\
за грэх астатні янычара.\\
\\
*\\
Слодыч слоў не бяру на веру.\\
Словы – рэха нязбытных сноў...\\
Хоць каханне – нішто без Веры,\\
ды я ў шчасце наноў – не веру.\\
\\
*\\
У абдымках цябе не душу...\\
Не дару пацалункаў каралі.\\
А парфумай пачуццяў душу\\
я тваю незмушона душу.

 


===== Падобныя старонкі =====
  * [[творы/эдуард-акулін/эдуард-акулін-журавіны-бяруць-жанчыны]]
  * [[творы/эдуард-акулін/эдуард-акулін-прыйдзе-час-і-яна-міне]]
  * [[слоўнік/туюг]]
  * [[творы/рыгор-крушына/рыгор-крушына-туюгі]]
  * [[творы/эдуард-акулін/творчасць-эдуарда-акуліна]]