~~META:
title = Эдзі Агняцвет — Рабінка
&keywords = жывой
&abstract = Верш Эдзі Агняцвет "Рабінка"
&iftrue = nan
~~

====== Эдзі Агняцвет — Рабінка ======
Яна ў двары ля дрэў дарослых\\
Расці нядаўна пачала.\\
Яе здзіўлялі травы ў росах,\\
Сцяжынка, ластаўка, пчала.\\
\\
Яе ж, маленькай і пахілай,\\
Амаль ніхто не прыкмячаў.\\
А мне была чамусьці мілай –\\
І паліваў, і даглядаў.\\
\\
Лісточак востры, як з’явіўся,\\
Блізнят паклікаў за сабой...\\
Ля дрэўца мімаходзь спыніўся\\
Хлапец з мянушкаю Разбой.\\
\\
Рабінку гнуў ён і калечыў!\\
Я гэта ўбачыў – сам не свой.\\
Паспеў ён крыкнуць:\\
«Ты, малеча!»\\
Я ж кінуўся ў кулачны бой.\\
\\
І лупцаваў падлетка злога –\\
Цяпер ён дасць сабе зарок!\\
Я ростам меншы, ды нічога!\\
Ён напалохаўся і ўцёк.\\
\\
Стаяла мілая рабінка,\\
Яна была жывой, жывой!\\
І, як удзячная дзяўчынка,\\
Мне ўсё ківала галавой.

 


===== Падобныя старонкі =====
  * [[творы/рыгор-ігнаценка/рыгор-ігнаценка-пасадзіце-рабінку]]
  * [[творы/алесь-пісьмянкоў/алесь-пісьмянкоў-рабіна-над-вірам]]
  * [[ibdc.ped>рабіна-4869]]
  * [[творы/яўген-крупенька/яўген-крупенька-рабінка]]
  * [[ibdc.ped>прыгажуня-рабіна]]