~~META:
title = Эдзі Агняцвет — Першае слова
&keywords = рукі, маці, голас, дзякуй
&abstract = Чытаць верш Эдзі Агняцвет "Першае слова"
&iftrue = nan
~~

====== Эдзі Агняцвет — Першае слова ======
Першы голас, які я пачула на свеце,\\
Быў голас маці.\\
Калыханку пад месяцам і на дасвецці\\
Спявала мне маці.\\
\\
Гэта – першая песня\\
І першае слова\\
Зямлі маёй весняй.\\
Гэта – ціхая ласка\\
І мару ахова.\\
Дзякуй, маці, за песню!\\
\\
Запаветныя, родныя фарбы і гукі –\\
Усё застаецца.\\
Дзякуй, мама, за рукі,\\
Бяссонныя рукі,\\
За адданае сэрца!\\
\\
Рукі цёплай пяшчоты,\\
Турботы і працы –\\
Ад ляноты лячылі.\\
Аніякай работы ў жыцці не цурацца\\
І мяне навучылі.\\
\\
Не пакрыўджу цябе,\\
З тваіх сцежак не збочу,\\
Засланю ад нягоды.\\
Я хачу, каб свяціліся радасцю вочы\\
І жыла ты заўсёды.

 


===== Падобныя старонкі =====
  * [[творы/іншае/слова-пра-паход-ігаравы]]
  * [[ibdc.ped>хто-ж-аўтар-слова-пра-паход-ігаравы]]
  * [[слоўнік/слова]]
  * [[творы/рыгор-крушына/рыгор-крушына-слова]]
  * [[ibdc.ped>роднае-слова]]