~~META:
title = Эдзі Агняцвет — Галоўны дворнік
&keywords = завіруха, снег, галоўны, дворнік, працуй, машын, чысцяць, гадзіны
&abstract = Чытаць верш Эдзі Агняцвет "Галоўны дворнік"
&iftrue = nan
~~

====== Эдзі Агняцвет — Галоўны дворнік ======
Завіруха,

завіруха!

Замяло дарогі пухам.\\
Цэлых дзве гадзіны\\
Чысцяць снег машыны.\\
Я рыдлёўку ўзяў таксама\\
І працую разам з мамай.\\
Толькі нас не хоча слухаць\\
Злая цётка-завіруха:

Носіцца, і скача,\\
І сіпіць, і плача,\\
І калючкі снегу\\
Кідае з разбегу.

І растуць сівыя горы,\\
Не спраўляюцца шафёры.\\
Цэлых тры гадзіны\\
Чысцяць снег машыны.\\
Вось на вуліцу раптоўна\\
Выйшаў дворнік наш галоўны.\\
Расчасаў ён на хаду\\
Агнявую бараду\\
І надзеў фартух свой новы,\\
Сшыты з воблакаў вясновых,\\
І пайшоў – снягам на страх –\\
Па дарогах, па дварах.\\
Завіруха – цётка злая –\\
Па задворках уцякае.\\
Я крычу:

– Працуй бясконца,

Наш галоўны дворнік – сонца!

 


===== Падобныя старонкі =====
  * [[творы/максім-лужанін/максім-лужанін-на-ўсходзе-сонца]]
  * [[творы/якуб-колас/якуб-колас-усход-сонца]]
  * [[творы/васіль-вітка/васіль-вітка-хто-памагае-сонцу]]
  * [[ibdc.ped>гімн-жыццю]]
  * [[ibdc.ped>сонца-не-стаіць-на-месцы]]