~~META:
title = Цішка Гартны — Сявец
&keywords = ўставай, сявец, чакае, бяры, ураджай
&abstract = Чытаць верш Цішкі Гартнага "Сявец"
&iftrue = nan
~~

====== Цішка Гартны — Сявец ======
Ўставай, сявец! бяры сяўню,\\
Аўса, вады давай у волю\\
Свайму ты вернаму каню\\
I ўжо рыхтуйся ехаць ў поле.

Прыйшла вясна, і там цябе\\
Чакае вызвеўшая ніва;\\
Яна гатовая к сяўбе\\
Й сяўца чакае ўжо рупліва.

За зіму ўспрэўшая зямля\\
Табе аддасць за працу многа!\\
Ўставай, сявец! Няхай сяўня\\
Не будзе пуста і убога.

Рукой зярнят бяры паўней\\
Ды кідай мерна жменя ў жменю;\\
Са збожжам ў сэрцы думкі сей\\
Надзеі, волі, адраджэння.

Ўставай, сявец! I тое знай,\\
Што думак глеба не абмане,\\
А дасць багаты ураджай\\
За пот праліты, за старанне.

Ўставай, сявец! Ідзі, ары\\
Здзярнелай нівы твае гоні;\\
Прыйшоў твой час – ужо пара\\
Пачаць сяўбу яшчэ сягоння!

\\
Капыль, 1909

\\
Крыніца: Гартны Ц. Збор твораў. У 4 т. Т. I: Вершы, 1909-1935. Апавяданні 1909-1927. Аўт. прадм. С. Александровіч. – Мн.: Маст. літ., 1987. – 438 с.

 


===== Падобныя старонкі =====
  * [[творы/цішка-гартны/цішка-гартны-спатканне]]
  * [[творы/цішка-гартны/цішка-гартны-зміцер-жылуновіч-штрэйкбрэх]]
  * [[творы/цішка-гартны/цішка-гартны-свае-блінцы]]
  * [[творы/цішка-гартны/цішка-гартны-трэскі-на-хвалях]]
  * [[творы/цішка-гартны/цішка-гартны-думкі]]