~~META:
title = Цётка — Музыкант беларускі
&keywords = Цётка, музыкант, беларускі
&abstract = Чытаць верш Алаізы Пашкевіч (Цёткі) "Музыкант беларускі"
&iftrue = nan
~~

====== Цётка — Музыкант беларускі ======
Зайграю на дудцы,\\
Вытну на гармоні,\\
Заплачу на скрыпцы\\
Аб мужыцкай долі.\\
\\
Надта ж ужо цяжка,\\
Душа з гора рвецца,\\
Слёзы так і льюцца,\\
Сэрца з болю б’ецца.\\
\\
Ну і грай жа, скрыпка,\\
Хай ляціць там песня,\\
Або свет пачуе,\\
Або душа трэсне.\\
\\
Скрыпка хутка плача, –\\
Аж лес лемантуе,\\
Толькі яе ноты\\
Сыты не пачуе.\\
\\
Хаця ж і пачуе –\\
Музыканта злае:\\
"Глядзі, ён, хамула,\\
Аб роўнасці бае".\\
\\
Ды так сыпну смыкам,\\
Як агнём па струнах,\\
Што ад майго грання\\
Людзі ёнкнуць у трунах.\\
\\
Ну дык плач жа, скрыпка,\\
Мо паны пачуюць,\\
Як хамы без хлеба,\\
Без страхі начуюць.\\
\\
I зацяў музыка\\
Смыкам ды па струнах, –\\
Пташкі задрыжэлі,\\
Пчолы сціхлі ў вуллях.\\
\\
Музыкант галосіць,\\
Скрыпка не махлюе,\\
Хутка "хамску" песню\\
Ўсенек свет пачуе.\\
\\
1904

 


===== Падобныя старонкі =====
  * [[творы/цётка-алаіза-пашкевіч/цётка-сварба]]
  * [[творы/цётка-алаіза-пашкевіч/цётка-міхаська]]
  * [[творы/цётка-алаіза-пашкевіч/цётка-мора]]
  * [[творы/цётка-алаіза-пашкевіч/цётка-алаіза-пашкевіч]]
  * [[творы/цётка-алаіза-пашкевіч/цётка-прысяга-над-крывавымі-разорамі]]