~~META:
title = Францішак Багушэвіч — Смык
&keywords = Багушэвіч, смык
&abstract = Чытаць верш Францішка Багушэвіча "Смык"
&iftrue = nan
~~

====== Францішак Багушэвіч — Смык ======
Ох, дайце ж мне смык,\\
Каб усюды граў!\\
Хоць бы сам я знік,\\
Абы голас даў;\\
Каб той голас чуць\\
Па усей зямлі,\\
Гдзе людзі жывуць,\\
Гдзе даўней жылі!\\
Выйшаў бы я ў гай,—\\
Чык-чырык дуба,\\
Аж ён граў бы, знай,\\
Як тая труба,\\
Што пазве на суд\\
У астатні час\\
Увесь Божы люд...\\
Пазаве і нас.\\
Хвойку б пацягнуў,\\
Каб аж бор прылёг,\\
Увесь лес сагнуў\\
У барані рог;\\
I завыў бы ён,\\
Каб усё пачуў,\\
I наш енк, і стон\\
У бары б лунуў!\\
Каб бярозку раз\\
Пацягнуў смыком,\\
Яна вечны б час\\
Раўла б з мужыком!\\
Каб аж зёлачкі\\
Заігралі бы,\\
Як шчыголачкі,\\
Заспявалі бы!\\
Як смычком бы тым\\
Камень зачапіць,\\
Дык пайшоў бы дым...\\
"Камень не сцярпіць!"\\
У жарству, пясок,\\
Каб рассыпаўся,\\
Каб даў галасок,\\
Аж захліпаўся!\\
Каб пачуў усяк\\
Ды каб літасць меў:\\
Каб цвёрды размяк,\\
Каб мяккі аж млеў!\\
Ох, каб мне той смык,\\
Каб на сэрцах граў,—\\
З радасцяй бы знік,\\
Абы голас даў!..

 


===== Падобныя старонкі =====
  * [[творы/францішак-багушэвіч/францішак-багушэвіч-ахвяра]]
  * [[творы/францішак-багушэвіч/францішак-багушэвіч-гора]]
  * [[творы/францішак-багушэвіч/творчасць-францішка-багушэвіча]]
  * [[творы/францішак-багушэвіч/францішак-багушэвіч-бог-не-роўна-дзеле]]
  * [[постаці/францішак-багушэвіч]]