~~META:
title = Францішак Багушэвіч — Воўк і авечка
&keywords = госці, воўк, воўка, сабе, цяпер, авечка
&abstract = Чытаць байку Францішка Багушэвіча "Воўк і авечка"
&iftrue = nan
~~

====== Францішак Багушэвіч — Воўк і авечка ======
Злавіў Воўк Ягнятка\\
І панёс жывое!\\
Плачуць сын і матка,\\
Як бабры, абое.\\
Воўк над маткай злітаваўся,\\
Як які аконам,\\
У аўчынку перабраўся\\
Ды ідзець з паклонам.\\
«Прыйшоў, – кажа, – я здалёчку\\
Расказаць пані Авечцы\\
Добру вестку аб сыночку, –\\
Як яму цяпер жывецца.\\
Не пазнала б ты ні колі,\\
Такі стаў дасужы\\
І жывець сабе на волі,\\
Без бяды, без нужы.\\
Зубы выраслі з клыкамі,\\
І адпалі рожкі.\\
Ножкі цяпер з кіпцюрамі,\\
А хвост даўжэйшы трошкі.\\
І ўжо Воўка не баіцца,\\
Ў хлеў ніхто не гоне;\\
Мае чым абараніцца\\
І другіх бароне!\\
Прыйдзі, імасць, да нас ў госці,\\
Справім сабе вечарынку:\\
Будзе мяса, будуць косці,\\
Будзем есць без адпачынку!» –\\
«Дзякуй, дзякуй, ягамосці,\\
За весці такія!\\
Няхай прыйдзе сын у госці,\\
Пагляджу, ці вые?\\
Бо, кажуць, між вамі\\
Трэба выць ваўкамі.\\
Я ж па-воўчы не умею\\
Ні выць, ні есці, ні лгаць.\\
Ды скінь скуру, дабрадзею,\\
Бо зубкі відаць».\\
\\
Авечка, хоць дурная,\\
А воўка ж пазнае!\\


\\
1891

 


===== Падобныя старонкі =====
  * [[творы/максім-танк/максім-танк-конь-і-леў]]
  * [[ibdc.ped>шэры-драпежнік]]
  * [[творы/алесь-бадак/алесь-бадак-воўк-і-навука]]
  * [[творы/алесь-якімовіч/алесь-якімовіч-хітры-воўк]]
  * [[творы/іван-шамякін/іван-шамякін-воўк]]