~~META:
title = Францішак Багушэвіч — Ахвяра
&keywords = каб, ніколі,  а, грошы,  i, сваго, умёрці, панам, трэба, панам ніколі
&abstract = Францішак Багушэвіч. Ахвяра
&iftrue = nan
~~

====== Францішак Багушэвіч — Ахвяра ======
Маліся ж, бабулька, да Бога,\\
Каб я панам ніколі не быў:\\
Не жадаў бы ніколі чужога,\\
Сваё дзела як трэба рабіў\\
Каб прад меншым я носу не драў,\\
А прад большым не корчыў спіны,\\
Каб грэх свой прад сабой я пазнаў,\\
У другіх каб не відзеў віны;\\
Чужых жон каб не вёў да граху,\\
А сваю каб як трэба любіў,\\
Каб мне дзеці былі у слуху,\\
Каб я бацькам для іх век дажыў,\\
Каб людзей прызнаваў за братоў,\\
А багацтва сваё меў за іх,\\
Каб за край быў умёрці гатоў,\\
Каб не прагнуў айчызны чужых.\\
Каб я Бога сваго не акпіў,\\
Каб не здрадзіў за грошы свой люд,\\
Каб сваго я дабра. не прапіў\\
I нізашто не меў чужы труд.\\
Каб па двойчы мне грошы не браць\\
За праданы кусочак раллі,\\
Каб сваю мне зямельку араць\\
I умёрці на ёй хоць калі.\\
Дык прасі ж ты у Бога, малі,\\
Каб я панам ніколі не быў!

 


===== Падобныя старонкі =====
  * [[творы/францішак-багушэвіч/францішак-багушэвіч-бог-не-роўна-дзеле]]
  * [[творы/францішак-багушэвіч/францішак-багушэвіч-гора]]
  * [[творы/францішак-багушэвіч/францішак-багушэвіч-смык]]
  * [[постаці/францішак-багушэвіч]]
  * [[творы/францішак-багушэвіч/творчасць-францішка-багушэвіча]]