~~META:
title = Уладзіслаў Галубок — Доля мужыка
&keywords = мужык, дзеці
&abstract = Чытаць верш "Доля мужыка" Уладзіслава Галубка
&iftrue = nan
~~

====== Уладзіслаў Галубок — Доля мужыка ======
Вясной якраз на нашых святах\\
Я быў ў засценку Ліпнякі,\\
А там у нізкіх, курных хатах\\
Жывуць галота-мужыкі.

Сагнуўся ракам і у дзверы\\
Упоўз я ў хату мужыка,\\
Каб сам не бачыў, не паверыў,\\
Як горка доля бедака.

На сценах голых і вільготных\\
Растуць грыбы, цячэ вада,\\
I льецца на дзяцей гаротных\\
Хвароба, нэндза і бяда.

Аконца мала чуць свіціцца,\\
Ніколі сонца не відаць,\\
Смурод і чад, у брудах дзеці:\\
Адно дзярэцца – пяць крычаць.

Няма ж спакою беднай маці,\\
Няма ратунку, ані сна,\\
Няма каму прыбраць у хаце,\\
Ляжыць схварэўшая адна.

А пры баку дзіця ў карыце –\\
Увесь у больках, заскаруз,\\
Закручаны у зрэбнай свіце,\\
Устаць не можа, бо нядуж.

А дзеці воўкам пазіраюць,\\
З мяне дзівяцца: хто такі?\\
Як бы нічога больш не знаюць,\\
Апроч балота, асакі!

Яфімка цяжка уздыхае,\\
З бядой не можа саўладаць,\\
Галодны дзеці, сам не мае\\
За што і рук сваіх зацяць.

Да свету ўстане, кіне дзетак,\\
На заработкі к пану йдзе,\\
Глытае пот з слязьмі і гэтак\\
Век пераходзіць у бядзе.

Чым, як жывуць, адкуль іх сіла?\\
Ні круп, ні хлеба, ні гаршка,\\
Здалося, я папаў ў магілу,\\
Але не ў хату мужыка...

Дык во дзе бачыць гора можам,\\
Жыццё і долю бедакоў,\\
А колькі іх на свеце божым,\\
Такіх ліпняцкіх мужыкоў!

 


===== Падобныя старонкі =====
  * [[творы/янка-купала/янка-купала-мужык]]
  * [[творы/якуб-колас/якуб-колас-мужык-і-пан]]
  * [[творы/ян-чачот/ян-чачот-як-то-добра-калі-мужык]]
  * [[творы/янка-купала/ідэйны-змест-паэмы-купалы-тарасава-доля]]
  * [[творы/цётка-алаіза-пашкевіч/цётка-мужык-не-змяніўся]]