~~META:
title = Уладзімір Ягоўдзік — Жаўрук
&keywords = рукі, бог, рука, вясны, кажуць, пайду, ястраба, біць, дарозе, кій, конік, саху, селянін, араты
&abstract = Апавяданне Уладзіміра Ягоўдзіка "Жаўрук"
&iftrue = True
~~

====== Уладзімір Ягоўдзік — Жаўрук ======
Жаўрукі вяртаюцца з выраю ў пачатку сакавіка. Сонца яшчэ не паспела злізаць снег, уначы і раніцай шчыпаецца мароз. А жаўрукі радасна звіняць над лугамі і палеткамі, вітаючы надыход вясны.\\
Дарэчы, іх тры браты: палявы жаўрук, баравы жаўрук і жаўрук-смяцюх, у якога на галаве тырчаць пярынкі, быццам чуб.\\
Людзі кажуць, што смяцюх бярэ саломінку, паднімаецца ў неба і крычыць:\\
– Пайду ястраба біць!.. Пайду ястраба біць!..\\
Потым саломінка выпадае з дзюбы, ён стрымгалоў кідаецца на зямлю, а па дарозе апраўдваецца:\\
– Кій упаў!.. Кій упаў!..\\
Мне вельмі падабаецца легенда, як з’явіліся жаўрукі. Ішоў па дарозе Бог і ўбачыў ён селяніна, які араў свой палетак. Конік ледзьве цягне саху, а кашуля ратая ажно змакрэла ад поту. Спыніўшы хаду, Бог паспачуваў чалавеку.\\
– Дзе ратай плача, там жняя скача! – адказаў яму селянін і запрасіў папалуднаваць разам.\\
Хоць які там полудзень! Луста чэрствага хлеба, дзве горкія цыбуліны ды збанок крынічнай вадзіцы... Аднак праўду кажуць: не дораг абед, а дораг прывет. Падмацаваўся Бог і спытаў гаспадара, якую ён хацеў бы мець сабе палёгку.\\
– Не трэба мне палёгкі, – сказаў селянін, – толькі абрыдла слухаць, як грукае каменне аб нарог...\\
Пагаманілі яны трохі і развіталіся. Араты далей павёў баразну, а Бог падняў з зямлі каменьчык і шпурнуў угору. Праз імгненне пад аблокамі, нібы званочак, зазвінела маленькая птушка. Весялей пацягнуў саху конік, усміхнуўся сам сабе араты. З таго часу жаўрукі гняздзяцца на полі, яны падобныя на шэрыя каменьчыкі.\\
Жаўрукам цяжка трымаць на маленькіх крылах званочкі вясны, але можна ім памагчы. Папрасіце маму, каб напякла з цеста чубаценькіх пташак, а ў нядзельку выйдзіце на вуліцу, як мага вышэй падкідайце іх надсабой і спявайце:

Жавароначкі, прыляціце,\\
Цёпла лецейка прынясіце!\\
Бо зімачка надаела,\\
Усе хлебушкі пераела!

 


===== Падобныя старонкі =====
  * [[творы/уладзімір-ягоўдзік/уладзіміра-ягоўдзік-сон-трава]]
  * [[творы/уладзімір-ягоўдзік/уладзімір-ягоўдзік-жабіны-вочкі]]
  * [[творы/уладзімір-ягоўдзік/уладзіміра-ягоўдзік-зязюліны-панчошкі]]
  * [[ibdc.ped>нясвіжскі-палац]]
  * [[творы/уладзімір-ягоўдзік/уладзімір-ягоўдзік-вялікая-сініца-і-яе-с]]