~~META:
title = Уладзімір Караткевіч — О вясна! Таполі! Свеце мілы!
&keywords = Караткевіч, вясна, таполі, мілы
&abstract = Чытаць верш Уладзіміра Караткевіча "О вясна! Таполі! Свеце мілы!"
&iftrue = nan
~~

====== Уладзімір Караткевіч — О вясна! Таполі! Свеце мілы! ======
О вясна! Таполі! Свеце мілы!\\
Сонца німб! Аблокі! Сад! Рака!\\
Залатая падаплёка крылаў\\
Маладога звонкага шпака!\\
Вечар зацяпліў бярозак свечы.\\
Я адзін. Ты не памёрла, не.\\
Мой забыты, мой апошні светач,\\
Ты ў чужым акне, а не ў труне.\\
Як магла застацца ты ў кайданах?\\
Як магла адмовіцца пайсці\\
Да палян, дзе месяц закаханы\\
Песні “сноў” блакітныя ўзрасціў?\\
Пэўна, я турму не здолеў тую\\
Гнеўнаю пагардай скалануць,\\
Дзе цябе цалуюць, як катуюць,\\
І ўладарна лашчаць, быццам б’юць.\\
Вей тваіх, плячэй тваіх пахілых\\
Болей не кране мая рука...\\
Над сусветам залатыя крылы\\
Маладога звонкага шпака.\\
Клічуць лебедзі ў начы вясенняй,\\
Кідаючы поўдзень салаўям,\\
І разліў шырокі, і натхненне,\\
Як любоў забытая мая.\\
І няма ў душы маёй праклёнаў,\\
І няма на веях цяжкіх слёз...\\
Заставайся ў клетцы залачонай –\\
Ты сама абрала гэты лёс.\\
Над кахання нашага магілай,\\
Што загубіцца ў былых вяках,\\
Залатая падаплёка крылаў\\
Маладога звонкага шпака.

 


===== Падобныя старонкі =====
  * [[творы/уладзімір-караткевіч/уладзімір-караткевіч-лісце-каштанаў]]
  * [[творы/уладзімір-караткевіч/творчасць-уладзіміра-караткевіча]]
  * [[творы/максім-танк/ідэйны-змест-паэмы-максіма-танка-люцыян]]
  * [[ibdc.ped>таполя]]
  * [[ibdc.ped>таполя-4071]]