~~META:
title = Уладзімір Караткевіч — Каложа
&keywords = каложа, зорка, нёман, ракета, бетлем, сыну
&abstract = Верш Уладзіміра Караткевіча "Каложа"
&iftrue = nan
~~

====== Уладзімір Караткевіч — Каложа ======
//Дануце Бічэль//

\\
Каложа, туга мая светлая!..\\
Ў чорны Нёман па чорным шкле\\
Сіняй кропляй спадае ракета,\\
Быццам зорка ў ціхі Бетлем.\\
Ў вокны цёмныя заглядае,\\
Ззяннем бледным шукае кутка,\\
Дзе хваіна ў грубцы страляе,\\
Дзе ў жанчыны дзіцё на руках.\\
Глянь, абраная. Гэта не ў Нёман,\\
Не ў цямноцце, не ў соне, не ў драму –\\
Ў веліч падае зорка бяздомная,\\
Ў снег і ў сэрца сыну твайму.\\
І ў няпэўным хвілінным блакіце,\\
Ўся адзіная, ўся са святла,\\
З небам, з Нёмнам, з зямлёю злітая,\\
З сэрцам нашым – Каложа ўзрасла.\\
Трохі ў зелень, як пер’е качынае,\\
Трохі ў бэз і трохі ў гранат,\\
Уся – крышталь невыказна сіні,\\
Ўся – як край наш, як сон, як вясна.\\
Ўскінь далоні тонкія ўгору,\\
Сыну неба акрэслі шлях,\\
Каб навекі адбіліся зоры\\
У тваіх і дзіцячых вачах.\\
Каб ніколі перуны чужынныя\\
Не асмеліліся скасіць\\
Ні цябе, ні Каложы,

дзяўчыны

З ніў і пушчаў Беларусі.\\
І калі ўзнясе вас над светамі –\\
Прыгадайце ў вечным святле,\\
Як самотная зорка – ракета\\
Ціха падала ў цёмны Бетлем.

 


===== Падобныя старонкі =====
  * [[творы/уладзімір-караткевіч/уладзімір-караткевіч-кніганошы]]
  * [[творы/уладзімір-караткевіч/уладзімір-караткевіч-чазенія-гдз]]
  * [[творы/уладзімір-караткевіч/уладзімір-караткевіч-кніганошы-гдз]]
  * [[творы/уладзімір-караткевіч/творчасць-уладзіміра-караткевіча]]
  * [[творы/уладзімір-караткевіч/уладзімір-караткевіч-лісце-каштанаў]]