~~META:
title = Уладзімір Жылка — Покліч
&keywords = штандар, воля
&abstract = Чытаць верш "Покліч" Уладзіміра Жылкі
&iftrue = nan
~~

====== Уладзімір Жылка — Покліч ======
Пад штандар бел-чырвона-белы\\
Гартуйся, раць, адважна, смела\\
Адважных, храбрых ваякоў!\\
І ўспомняцца старых вякоў\\
Паходы мужныя у славе,\\
Часы Альгерда, Ізяслава,\\
Грунвальдскі з немцам бой!\\
І боек даўні цяг з Масквой!\\
\\
Пад знак Літоўскае Пагоні -\\
Абараняць краіны гоні,\\
Народ забраны вызваляць,\\
Ісці к святлу, святлом палаць -\\
Спяшайся той, хто к волі рвецца,\\
Ў кім беларуса сэрца б'ецца!\\
Збірайцесь - ўсе, як бы адзін, -\\
Арлы радзімых пушч, нізін!\\
\\
Не плач, не плач па сыну, маці, -\\
Сягоння сорам быць у хаце,\\
Бо ўзнят за волю грозны меч,\\
Бо хутка будзе злая сеч,\\
Няхай і ён, юнак адважны,\\
Ідзе туды, дзе б'ецца кажны\\
За волю новую без слёз,\\
За лепшы Бацькаўшчыны лёс.\\
\\
Пад штандар кожны здатны, гожы,\\
Досць нас наезнікам варожым\\
Трымаць ў прыгоне, беднаце,\\
Смяяцца нашай цемнаце,\\
Багацце краю нішчыць, пляжыць -\\
Чужынцу годзе намі княжыць\\
І карыстацца з нашых плеч!..\\
Мы к волі йдзем - з дарогі прэч!..\\
\\
(1920)

 


===== Падобныя старонкі =====
  * [[творы/аркадзь-куляшоў/сцяг-брыгады-ідэйны-змест-мастацкія-асаб]]
  * [[творы/аркадзь-куляшоў/аркадзь-куляшоў-сцяг-брыгады]]
  * [[ibdc.ped>дзяржаўны-сцяг-рэспублікі-беларусь]]
  * [[творы/алесь-салавей/алесь-салавей-трыялет]]
  * [[ibdc.ped>свяшчэнныя-атрыбуты-дзяржавы]]