~~META:
title = Уладзімір Жылка — Палімпсест
&keywords = Жылка, палімпсест
&abstract = Чытаць верш Уладзіміра Жылкі "Палімпсест"
&iftrue = nan
~~

====== Уладзімір Жылка — Палімпсест ======
Ёсць рукапісы, змест якіх сцярты, ледзь знаць\\
Ці нат другі напісан сэнс бязбожна.\\
Іх палімпсестамі прынята здаўна зваць,\\
I першы іхні змысл пайме не кожны.\\
\\
Краіна родная! Так сталася й з табой.\\
Багацце й хараство твае прыроды\\
I прошласць слаўную змяшаў чужак з гразёй\\
I словы вывеў гідкія для зводу.\\
\\
Але працоўны дух, разбіўшы мур турмы,\\
Здалеў вяковы бруд паганы змесці.\\
I з дзіўнай любасцю чытаем тое мы,\\
Што захавалася на палімпсесце.\\
\\
1921

 


===== Падобныя старонкі =====
  * [[творы/уладзімір-жылка/уладзімір-жылка-марта]]
  * [[творы/уладзімір-жылка/уладзімір-жылка-каханне]]
  * [[творы/уладзімір-жылка/уладзімір-жылка-меч]]
  * [[творы/уладзімір-жылка/уладзімір-жылка-хараство]]
  * [[постаці/уладзімір-жылка]]