~~META:
title = Уладзімір Жылка — Мы любім даўнія паданні...
&keywords = дзён, даўнія, паданні, любім
&abstract = Чытаць верш Уладзіміра Жылкі "Мы любім даўнія паданні..."
&iftrue = nan
~~

====== Уладзімір Жылка — Мы любім даўнія паданні... ======
Мы любім даўнія паданні,\\
Быліцы сівых песняроў.\\
Няхітры іх апавяданні\\
Аб справах мінулых часоў.\\
\\
Нам даспадобы чэрпаць веду\\
Гісторыі з пажоўклых кніг;\\
З рукопісаў пра быт прадзедаў\\
Даведацца, што сведчыць мніх.\\
\\
Прыемна нам дзядоў надзеі,\\
Іх тайны думы адзначаць,\\
Вялікія ў мінулым дзеі,\\
Дзе й як змагалась наша раць.\\
\\
Шануем мы бацькоў імёны:\\
Навука й прыклад нам яны;\\
І помнім мы і веча звоны,\\
І вольнасць роднай стараны;\\
\\
І нат мамэнты заняпаду –\\
Ў далёкім сумныя лісты –\\
Распазнаваць нас вучаць здраду\\
І родзяць помсты гнеў святы.\\
\\
Але нам будуць ўсё ж мілейшы\\
Часы, калі з нізін, балот\\
З надзеяй ў шчаснасць дзён святлейшых\\
Устане ўзбуджаны народ.\\
\\
Не відна йшчэ у завірусе,\\
Куды ляжыць ягоны шлях,\\
Але дух творчы ў Беларусі\\
Жыве й змагае долі жах.\\
\\
І, можа, толькі той збаіцца\\
Падзей вялікіх нашых дзён,\\
У кім жыцця не б’е крыніца,\\
Хто спіць і здолець недуж сон.\\
\\
1921

 


===== Падобныя старонкі =====
  * [[творы/уладзімір-жылка/уладзімір-жылка-марта]]
  * [[творы/уладзімір-жылка/уладзімір-жылка-меч]]
  * [[постаці/уладзімір-жылка]]
  * [[творы/уладзімір-жылка/уладзімір-жылка-каханне]]
  * [[творы/уладзімір-жылка/уладзімір-жылка-хараство]]