~~META:
title = Уладзімір Жылка — Меч
&keywords = Жылка, меч
&abstract = Чытаць верш "Меч" Уладзіміра Жылкі
&iftrue = nan
~~

====== Уладзімір Жылка — Меч ======
Яго ў зямлі знайшоў маёй разлогай,\\
Аручы прадзедаў вузкі загон.\\
Вясёлым звонам аказаўся ён,\\
Калі чапіў канцом майго нарога.\\
\\
Абцёр набожна йржу часу благога,\\
І заблішчаў старых стагоддзяў сон,\\
І надпіс на клінку, нібы закон, -\\
«Дарэшты бой!» - зірнуў загадам строга.\\
\\
І вось няма нясмеласці, разваг.\\
Для сэрца вернага - чужынцам страх:\\
Радзімы схоў вартуйце, маткі, сёстры!\\
\\
Я з грамадой іду па шчасце нам.\\
Мой меч зіхціць, непераможны, востры.\\
Змагуся сам - дык сотням перадам!\\
\\
1924

 


===== Падобныя старонкі =====
  * [[слоўнік/санет]]
  * [[творы/янка-купала/янка-купала-для-зямлі-прадзедаў-маіх]]
  * [[творы/максім-багдановіч/максім-багдановіч-санет-паміж-пяскоў-егі]]
  * [[творы/максім-багдановіч/максім-багдановіч-санет-замёрзла-ноччу-ш]]
  * [[слоўнік/вянок-санетаў]]