~~META:
title = Уладзімір Жылка — Ляпей жабрачы лёс...
&keywords = ляпей, жабрачы
&abstract = Чытаць верш Уладзіміра Жылкі "Ляпей жабрачы лёс..."
&iftrue = nan
~~

====== Уладзімір Жылка — Ляпей жабрачы лёс... ======
Ляпей жабрачы лёс,\\
У рукі кій, за плечы торба;\\
Ляпей страха нябёс,\\
Бясконцы шлях і леры корба;\\
\\
Ляпей чужыны золь,\\
Сцякаць ад чорнай працы потам;\\
Ляпей, не змогшы боль,\\
Сканаць самотнаму пад плотам, –\\
\\
Але не лёс раба\\
З бязволля ўласнага й бяссілля;\\
Не гэтая жальба,\\
Не скутыя рабамі крыллі.\\
\\
Хто волю верна сніць,\\
Працят лятункам аб вялікім,\\
Таго не спакусіць\\
Ні ўладай, ні дабром бязлікім.\\
\\
І хай прысуд гняце\\
І нікнуць вербалозы ніца, –\\
Душы аб пекнаце\\
Непераможна-думных сніцца.\\
\\
1923

 


===== Падобныя старонкі =====
  * [[творы/уладзімір-жылка/уладзімір-жылка-каханне]]
  * [[творы/уладзімір-жылка/уладзімір-жылка-меч]]
  * [[творы/уладзімір-жылка/уладзімір-жылка-хараство]]
  * [[творы/уладзімір-жылка/уладзімір-жылка-марта]]
  * [[постаці/уладзімір-жылка]]