~~META:
title = Уладзімір Дубоўка — Ці снег, ці завея
&keywords = надыдзе, снег, гучней, жалею, завея, золкі, туман
&abstract = Чытаць верш Уладзіміра Дубоўкі "Ці снег, ці завея"
&iftrue = nan
~~

====== Уладзімір Дубоўка — Ці снег, ці завея ======
Ці снег, ці завея,\\
ці золкі туман.\\
Таго не жалею,\\
таго, што няма.\\
\\
Гады маладыя,\\
юнацкая кроў!\\
Агонь гіне дымам,\\
не прыйдзе ізноў.\\
\\
Дык, арфы і цытры, –\\
гучней і гучней!\\
Хай вашыя рытмы\\
абудзяць людзей.\\
\\
У вочах узрочных\\
фіялкі з расой.\\
Нашто укарочваць\\
спатканні з красой.\\
\\
Мінула – надыдзе,\\
надыдзе – міне.\\
Ніколі не скрыўдзіць\\
прыгожы нас дзень.\\
\\
Раз келіх наліты, –\\
жыццё – не віно, –\\
пакуль не дапіты,\\
не ўбачыш ты дно.\\
\\
Ці снег, ці завея,\\
ці золкі туман.\\
Таго не жалею,\\
чаго не стрымаць.\\
\\
1926

\\
Крыніца: Дубоўка У. Выбраныя творы: у 2 т. Т. 1. Вершы. – Мінск: Беларусь, 1965. – 540 с.

 


===== Падобныя старонкі =====
  * [[творы/уладзімір-дубоўка/уладзімір-дубоўка-часіна-ды-з-сокам-рабі]]
  * [[творы/уладзімір-дубоўка/уладзімір-дубоўка-як-сінячок-да-сонца-лё]]
  * [[творы/уладзімір-дубоўка/лірыка-уладзіміра-дубоўкі]]
  * [[постаці/уладзімір-дубоўка]]
  * [[творы/уладзімір-дубоўка/уладзімір-дубоўка-паляжам-мы]]