~~META:
title = Уладзімір Дубоўка — Ты мне гаворыш
&keywords = попел, шчасце, вецер, годзе
&abstract = Чытаць верш Уладзіміра Дубоўкі "Ты мне гаворыш"
&iftrue = nan
~~

====== Уладзімір Дубоўка — Ты мне гаворыш ======
Ты мне гаворыш, што долю і волю\\
бачыць не суджана нашай айчыне?\\
Вецер ганяе тут попел над полем,\\
попел у спадчыну вораг пакінуў?\\
\\
Беднасць пануе ў пясках і каменні,\\
стогне народ пад абцасам у пана?\\
I да святла ў нас не будзе імкненняў,\\
бо найгарчэйшае наканавана?\\
\\
Годзе і годзе, таварыш пакорны!\\
Так жа было, але гэтак не будзе!\\
Нас недарэмна малолі у жорнах, –\\
з кожнай пакруткай мацнелі ўсё людзі.\\
\\
Выдзьме ўвесь попел, як ворага вецер,\\
выжане рабскую кроў і пакору.\\
Займе айчына пасад свае ў свеце,\\
заўтра – не будзе падобна на ўчора.\\
\\
Шчасце здабудуць мазольныя рукі,\\
шчасце мы створым сваімі рукамі.\\
Ведаць не будуць пра гора унукі,\\
Што панавала адвеку над намі.\\
\\
1922

\\
\\
Крыніца: Дубоўка У. Выбраныя творы: у 2 т. Т. 1. Вершы. – Мінск: Беларусь, 1965. – 540 с.

 


===== Падобныя старонкі =====
  * [[творы/уладзімір-дубоўка/уладзімір-дубоўка-часіна-ды-з-сокам-рабі]]
  * [[творы/уладзімір-дубоўка/лірыка-уладзіміра-дубоўкі]]
  * [[постаці/уладзімір-дубоўка]]
  * [[творы/уладзімір-дубоўка/уладзімір-дубоўка-як-сінячок-да-сонца-лё]]
  * [[творы/уладзімір-дубоўка/уладзімір-дубоўка-паляжам-мы]]