~~META:
title = Уладзімір Дубоўка — Пра дзеда і ўнука
&keywords = дзеда, унук, тата, маці
&abstract = Чытаць казку Уладзіміра Дубоўкі "Пра дзеда і ўнука"
&iftrue = nan
~~

====== Уладзімір Дубоўка — Пра дзеда і ўнука ======
**1**

Недзе далёка\\
ў вёсцы маленькай\\
век дажываў свой\\
дзедка старэнькі.\\
\\
Старасць — не радасць.\\
Сядзе абедаць —\\
ежа ліецца\\
з лыжкі у дзеда.\\
\\
Пазалівае\\
чысты абрус так\\
ён і заціркай,\\
ён і капустай.\\
\\
З гэтай прычыны\\
дзеда старога\\
есці саджалі\\
каля парога.\\
\\
Там ён і снедаў,\\
там і абедаў,\\
там ён з унукам\\
меў і бяседы...\\


\\
**2**

Дзедаў унучак,\\
мамін сыночак,\\
ножык узяўшы,\\
сеў у куточак.\\
\\
Нешта майструе,\\
нешта складае.\\
Будзе, напэўна,\\
цацка якая.\\
\\
Маці пытае:\\
— Любы сыночак!\\
Што ж ты майструеш,\\
сеўшы ў куточак?\\
\\
Што ж гэта будзе,\\
скрыначка быццам?\\
— Будзе, матуля,\\
гэта — карытца.\\
\\
Як пастарэеце\\
з татам абое,\\
вас не прыму я\\
есці з сабою.\\
\\
Каля карытца\\
вас пасаджаю,\\
поснай заціркі\\
паналіваю...\\
\\
Тата на маму,\\
мама на тату\\
глянулі моўчкі:\\
«Хто ж вінаваты?»\\


**3**

З гэтага часу\\
дзеда старога\\
больш не саджалі\\
каля парога.\\
\\
Так, як усюды,\\
у кожнай сямейцы,\\
разам з сабою\\
далі яму месца...\\
\\
Казачка гэта\\
вельмі старая,\\
ходзіць па свеце\\
з краю да краю.\\
\\
Хто пра яе\\
і забудзецца, можа,\\
ўнучак маленькі\\
зноў дапаможа:\\
\\
Ён пачытае.\\
Хоць ведаюць людзі,\\
але напомніць\\
лішнім не будзе.

 


===== Падобныя старонкі =====
  * [[ibdc.ped>дзед-і-ўнук]]
  * [[постаці/уладзімір-дубоўка]]
  * [[творы/анатоль-грачанікаў/анатоль-грачанікаў-цікаўны-ўнук]]
  * [[творы/мікола-чарняўскі/мікола-чарняўскі-майстры]]
  * [[творы/уладзімір-дубоўка/уладзімір-дубоўка-як-сінячок-да-сонца-лё]]