~~META:
title = Уладзімір Дубоўка — Прамерыць гоні шмат разоў араты
&keywords = араты
&abstract = Чытаць верш Уладзіміра Дубоўкі "Прамерыць гоні шмат разоў араты"
&iftrue = nan
~~

====== Уладзімір Дубоўка — Прамерыць гоні шмат разоў араты ======
Прамерыць гоні шмат разоў араты,\\
пакуль даручыць зерне пухкай глебе;\\
не раз вачыма павартуе ў небе\\
збытэчнай хмары для засмаглай шаты.\\
\\
Загоны ў часе пільна будуць зжаты:\\
ў тарпу не трапіць зелле-непатрэб'е.\\
Спажытак, схованы жыццём у хлебе,\\
для клёку атрымаем незакляты.\\
\\
Кіруючыся вечнаю умовай,\\
і ты, паэта, уладар над мовай,\\
рыхтуй уважна грунт і працавіта.\\
\\
Ў люд паспаліты перлам неўмірушчым\\
яна зайльсніцца, змірсцямі спавіта,\\
калі ад слова шумавінне злушчым.

 


===== Падобныя старонкі =====
  * [[творы/максім-багдановіч/максім-багдановіч-санет-замёрзла-ноччу-ш]]
  * [[творы/янка-купала/янка-купала-для-зямлі-прадзедаў-маіх]]
  * [[слоўнік/вянок-санетаў]]
  * [[творы/максім-багдановіч/максім-багдановіч-санет-паміж-пяскоў-егі]]
  * [[слоўнік/санет]]