~~META:
title = Уладзімір Дубоўка — Паляжам мы
&keywords = Дубоўка, паляжам
&abstract = Чытаць верш "Паляжам мы" Уладзіміра Дубоўкі
&iftrue = nan
~~

====== Уладзімір Дубоўка — Паляжам мы ======
Паляжам мы, і вецер нашы косці\\
паточыць, пылам над лясамі разнясе.\\
А ўсё ж ткі мы шукаем прыгажосці,\\
штодзённа кленчым мы сваёй красе.\\
\\
Яны ў гаях, крыніцах гаманлівых,\\
у шуме-гомане лясных азёр,\\
у моры збожжа на палетках-нівах;\\
красой уквечаны увесь прастор...\\
\\
Іграй, іграй, мой дружа цымбалісты,\\
каб дні вясны маёй са струн зляталі.\\
Ішлі яны пад вэлюмам імглістым\\
і гінулі ў жыцці, як хвалі ў хвалях.\\
\\
Не шкадаваў, не скардзіўся нікому,\\
хоць часам дух звіваўся ў немы лямант,\\
а свет увесь, нязнаны і знаёмы,\\
мне выдаваўся нейкай чорнай плямай.\\
\\
Іграй, іграй, каб струны галасілі\\
і захліпаліся, як я сягоння.\\
Загіну з гукамі ў тумане сінім,\\
а не схілю ні галаву, ні скроні.\\
\\
Аддам усё за гукі шчырай песні,\\
якая прыйдзе ў барваванні новым.\\
Ад Віленскіх азёр да сумнага Палесся\\
яе сустрэнем задушэўным словам.\\
\\
1925

 


===== Падобныя старонкі =====
  * [[творы/уладзімір-дубоўка/уладзімір-дубоўка-як-сінячок-да-сонца-лё]]
  * [[творы/уладзімір-дубоўка/уладзімір-дубоўка-часіна-ды-з-сокам-рабі]]
  * [[постаці/уладзімір-дубоўка]]
  * [[творы/уладзімір-дубоўка/лірыка-уладзіміра-дубоўкі]]
  * [[творы/уладзімір-дубоўка/уладзімір-дубоўка-i-гінулі-яны-за-косы-к]]